Farg‘ona shahrida “Odam savdosi va u bilan bog‘liq jinoyatlarni tergov qilishning ilg‘or xorijiy tajriba va amaliyoti” mavzusida o‘quv mashg‘ulotlari o‘tkazilmoqda, deb xabar beradi “Daryo” muxbiri Azizjon Ermatov.
20-iyulga qadar o‘tkaziladigan o‘quv mashg‘ulotlariga Farg‘ona, Andijon va Namangan viloyatlari ichki ishlar boshqarmalarining odam savdosi va terrorizmga qarshi kurashish xizmati mutaxassislari, tergovchi va tezkor xodimlari jalb etilgan.
Treningda o‘quv mashg‘ulotlari transmilliy uyushgan jinoyatchilik va odam savdosiga qarshi kurash bo‘yicha Yevropa ittifoqi yetakchi eksperti Berni Greyvett, Metropolitan politsiyasi bosh inspektori, odam savdosi masalalari bo‘yicha tajribali mutaxassis Kolin Karsuell, Metropolitan politsiyasining xalqaro salohiyatni oshirish bo‘limi sobiq rahbari, terrorizmga qarshi kurashish masalalari bo‘yicha mutaxassis Stiv Eshvell kabi xorijiy mutaxassislar, shuningdek, Ichki ishlar vazirligining malakali xodimlari tomonidan o‘tilmoqda.
O‘quv mashg‘ulotlarida odam savdosi, u bilan bog‘liq jinoyatlarni fosh etish va tergov qilish, terrorizmga qarshi kurashishda xalqaro hamkorlikni mustahkamlash masalalari muhokama etilib, xorijiy tajribalarni O‘zbekiston sharoitida qo‘llash imkoniyatlari ko‘rib chiqilmoqda.
“Trening mashg‘ulotlari juda qiziqarli o‘tmoqda. Xorijiy huquq-tartibot organlari faoliyati, odam savdosi jinoyatiga qarshi kurashishdagi xalqaro uslublar haqida zarur ma’lumotlarga ega bo‘lyapmiz. O‘rgangan tajribalarimiz mazkur jinoyatlarga qarshi kurashishda bizga katta yordam berishiga ishonaman,” – deydi Farg‘ona viloyati IIB terrorizm va ekstremizmga qarshi kurashish boshqarmasi xodimi, katta leytenant Boburjon Madaminov.
Izoh (0)