Фарғона шаҳрида «Одам савдоси ва у билан боғлиқ жиноятларни тергов қилишнинг илғор хорижий тажриба ва амалиёти» мавзусида ўқув машғулотлари ўтказилмоқда, деб хабар беради «Дарё» мухбири Азизжон Эрматов.
20 июлга қадар ўтказиладиган ўқув машғулотларига Фарғона, Андижон ва Наманган вилоятлари ички ишлар бошқармаларининг одам савдоси ва терроризмга қарши курашиш хизмати мутахассислари, терговчи ва тезкор ходимлари жалб этилган.
Тренингда ўқув машғулотлари трансмиллий уюшган жиноятчилик ва одам савдосига қарши кураш бўйича Европа иттифоқи етакчи эксперти Берни Грейвеет, Метрополитан полицияси бош инспектори, одам савдоси масалалари бўйича тажрибали мутахассис Колин Карсуэлл, Метрополитан полициясининг халқаро салоҳиятни ошириш бўлими собиқ раҳбари, терроризмга қарши курашиш масалалари бўйича мутахассис Стив Эшвелл каби хорижий мутахассислар, шунингдек, Ички ишлар вазирлигининг малакали ходимлари томонидан ўтилмоқда.
Ўқув машғулотларида одам савдоси, у билан боғлиқ жиноятларни фош этиш ва тергов қилиш, терроризмга қарши курашишда халқаро ҳамкорликни мустаҳкамлаш масалалари муҳокама этилиб, хорижий тажрибаларни Ўзбекистон шароитида қўллаш имкониятлари кўриб чиқилмоқда.
«Тренинг машғулотлари жуда қизиқарли ўтмоқда. Хорижий ҳуқуқ-тартибот органлари фаолияти, одам савдоси жиноятига қарши курашишдаги халқаро услублар ҳақида зарур маълумотларга эга бўляпмиз. Ўрганган тажрибаларимиз мазкур жиноятларга қарши курашишда бизга катта ёрдам беришига ишонаман,» – дейди Фарғона вилояти ИИБ терроризм ва экстремизмга қарши курашиш бошқармаси ходими, катта лейтенант Бобуржон Мадаминов.
Изоҳ (0)