Indoneziyada dengizda bir yarim yil avval yo‘qolgan ayol topildi. U tirik va uni oxirgi marta ko‘rishgandagi kiyimda bo‘lgan. Bu haqda Dudung Pret xabar berdi.
2017-yilning boshida 52 yoshli Nining Sunarsix Yava orolidagi Sukabumi shahri yaqinida dam olishga chiqqan. Guvohlar ayolni plyajda ulkan to‘lqin oqizib ketganini tasdiqlagan. Ayol qichqirgan va yordamga chaqirgan, biroq hech kim kuchli to‘lqin sababli suvga kirishga jazm qila olmagan. Qutqaruvchilar uzoq vaqt davomida Sunarsixni topa olmagan.
Bir haftadan keyin Sukabumi hududida noma’lum kishining jasadi topilgan, biroq ekspertiza jasad yo‘qolgan ayolniki emasligini ko‘rsatgan. Yana bir necha haftadan keyin mahalliy hokimiyat qidiruv ishlarini to‘xtatgan va Sunarsixni o‘lgan deb e’lon qilgan.
Ayolning oilasi uning o‘limini tan olishdan bosh tortgan. Joriy yilning iyun oyining oxirida ayolning amakisi Sunarsix yaqinlarini o‘zi yo‘qolgan playj yaqinida kutayotgani haqida bir necha marta tush ko‘rgan. Shundan so‘ng oila 30-iyun kuni plyajga yo‘l olgan, biroq qidirishlar muvaffaqiyatsiz bo‘lgan. Ertasi kuni esa qarindoshlar Sunarsix yo‘qolgan joyga kelgan va uni hushsiz holatda topgan. Uning egnida yo‘qolgan kundagi kiyimlar bo‘lgan.
Oila ayolni kasalxonaga olib borgan. Shifokorlar ayol achinarli ahvolda ekanligini, biroq tezda tuzalib ketishini aytgan.
Shahar qutqaruv xizmati rahbari voqeaning haqiqiyligini tasdiqlagan. Ayni paytda surishtiruv olib borilmoqda. Aslida nima bo‘lganini esa ayol gapira oladigan bo‘lgandan keyingina bilish mumkin bo‘ladi.
Izoh (0)