Индонезияда денгизда бир ярим йил аввал йўқолган аёл топилди. У тирик ва уни охирги марта кўришгандаги кийимда бўлган. Бу ҳақда Dudung Pret хабар берди.
2017 йилнинг бошида 52 ёшли Нининг Сунарсих Ява оролидаги Сукабуми шаҳри яқинида дам олишга чиққан. Гувоҳлар аёлни пляжда улкан тўлқин оқизиб кетганини тасдиқлаган. Аёл қичқирган ва ёрдамга чақирган, бироқ ҳеч ким кучли тўлқин сабабли сувга киришга жазм қила олмаган. Қутқарувчилар узоқ вақт давомида Сунарсихни топа олмаган.
Бир ҳафтадан кейин Сукабуми ҳудудида номаълум кишининг жасади топилган, бироқ экспертиза жасад йўқолган аёлники эмаслигини кўрсатган. Яна бир неча ҳафтадан кейин маҳаллий ҳокимият қидирув ишларини тўхтатган ва Сунарсихни ўлган деб эълон қилган.
Аёлнинг оиласи унинг ўлимини тан олишдан бош тортган. Жорий йилнинг июнь ойининг охирида аёлнинг амакиси Сунарсих яқинларини ўзи йўқолган плайж яқинида кутаётгани ҳақида бир неча марта туш кўрган. Шундан сўнг оила 30 июнь куни пляжга йўл олган, бироқ қидиришлар муваффақиятсиз бўлган. Эртаси куни эса қариндошлар Сунарсих йўқолган жойга келган ва уни ҳушсиз ҳолатда топган. Унинг эгнида йўқолган кундаги кийимлар бўлган.
Оила аёлни касалхонага олиб борган. Шифокорлар аёл ачинарли аҳволда эканлигини, бироқ тезда тузалиб кетишини айтган.
Шаҳар қутқарув хизмати раҳбари воқеанинг ҳақиқийлигини тасдиқлаган. Айни пайтда суриштирув олиб борилмоқда. Аслида нима бўлганини эса аёл гапира оладиган бўлгандан кейингина билиш мумкин бўлади.
Изоҳ (0)