O‘zbekiston mudofaasiga ko‘maklashuvchi “Vatanparvar” tashkiloti Namangan viloyati hududiy kengashi tasarrufidagi Namangan avtomobil maktabida haydovchilarni tayyorlash va qayta tayyorlash, malakasini oshirish jarayonlariga fan-texnikaning so‘nggi yutuqlarini tatbiq etishga alohida e’tibor qaratilmoqda. Bu haqda O‘zA xabar berdi.
Tashkilotning barcha o‘quv va sport muassasalarida moddiy-texnik bazani modernizatsiya qilish bo‘yicha keng ko‘lamli ishlar amalga oshirildi. Barcha tumanlarda tashkilot tasarrufidagi binolar ta’mirlandi, o‘quv xonalari zamonaviy o‘quv-mashg‘ulot jihozlari, texnik vositalar bilan ta’minlandi. O‘quv va imtihon xonalariga 104 ta audio-video kuzatuv moslamasi o‘rnatilgani nazariy mashg‘ulot va imtihonlar shaffofligini ta’minlashga xizmat qilmoqda.
— Uchqo‘rg‘on tumani o‘quv sport-texnika klubi uchun yangi o‘quv binosi qurib berilgani sohaga qaratilayotgan alohida e’tibor ifodasidir, – deydi “Vatanparvar” tashkiloti Namangan viloyati kengashi raisi A.A’loxo‘jayev. — Ikki qavatli binoda innovatsion o‘quv texnologiyalari bilan jihozlangan 8 o‘quv xonasi, zamonaviy avtotrenajyor va yakuniy imtihon olish xonalari mavjud. Har bir o‘quv xonasida 25 nafar o‘quvchining zamonaviy bilim olishi uchun barcha sharoit yaratilgan. Jumladan, sinfxonalar kompyuter, videopleyer, televizor, Smart board M-600 rusumli interaktiv animatsion doska kabi zamonaviy axborot-kommunikatsiya vositalari bilan ta’minlangan.
Sinfxonalar Nexia avtomobilining qirqimli maketi, yengil va yuk avtomobillarining ishchi mexanizmlari, svetofor hamda shahar maketlari, avtomobil qismlari ko‘rgazmasi, yo‘l harakati xavfsizligi belgilari singari o‘quv-amaliy ko‘rgazmali qurollar bilan jihozlangani o‘quvchilarning nazariy bilimini oshirishda muhim ahamiyat kasb etadi. O‘quvchilar haydovchilik mahorati bo‘yicha olgan sabog‘ini avtotrenajyor mashg‘ulotlarida mustahkamlaydi.
Tashkilot avtomobil saroyini yangi transport vositalari bilan to‘ldirish bo‘yicha tuzilgan shartnoma asosida 3 ta Matiz, 7 ta Nexia avtomobili sotib olindi. Yil yakuniga qadar rejada belgilangan yana 10 mashina bosqichma-bosqich keltirilib, o‘quv mashg‘ulotlarida foydalanishga beriladi.
Izoh (0)