Ўзбекистон мудофаасига кўмаклашувчи «Ватанпарвар» ташкилоти Наманган вилояти ҳудудий кенгаши тасарруфидаги Наманган автомобиль мактабида ҳайдовчиларни тайёрлаш ва қайта тайёрлаш, малакасини ошириш жараёнларига фан-техниканинг сўнгги ютуқларини татбиқ этишга алоҳида эътибор қаратилмоқда. Бу ҳақда ЎзА хабар берди.
Ташкилотнинг барча ўқув ва спорт муассасаларида моддий-техник базани модернизация қилиш бўйича кенг кўламли ишлар амалга оширилди. Барча туманларда ташкилот тасарруфидаги бинолар таъмирланди, ўқув хоналари замонавий ўқув-машғулот жиҳозлари, техник воситалар билан таъминланди. Ўқув ва имтиҳон хоналарига 104 та аудио-видео кузатув мосламаси ўрнатилгани назарий машғулот ва имтиҳонлар шаффофлигини таъминлашга хизмат қилмоқда.
— Учқўрғон тумани ўқув спорт-техника клуби учун янги ўқув биноси қуриб берилгани соҳага қаратилаётган алоҳида эътибор ифодасидир, – дейди «Ватанпарвар» ташкилоти Наманган вилояти кенгаши раиси А.Аълохўжаев. — Икки қаватли бинода инновацион ўқув технологиялари билан жиҳозланган 8 ўқув хонаси, замонавий автотренажёр ва якуний имтиҳон олиш хоналари мавжуд. Ҳар бир ўқув хонасида 25 нафар ўқувчининг замонавий билим олиши учун барча шароит яратилган. Жумладан, синфхоналар компьютер, видеоплеер, телевизор, Smart board М-600 русумли интерактив анимацион доска каби замонавий ахборот-коммуникация воситалари билан таъминланган.
Синфхоналар Nexia автомобилининг қирқимли макети, енгил ва юк автомобилларининг ишчи механизмлари, светофор ҳамда шаҳар макетлари, автомобиль қисмлари кўргазмаси, йўл ҳаракати хавфсизлиги белгилари сингари ўқув-амалий кўргазмали қуроллар билан жиҳозлангани ўқувчиларнинг назарий билимини оширишда муҳим аҳамият касб этади. Ўқувчилар ҳайдовчилик маҳорати бўйича олган сабоғини автотренажёр машғулотларида мустаҳкамлайди.
Ташкилот автомобиль саройини янги транспорт воситалари билан тўлдириш бўйича тузилган шартнома асосида 3 та Matiz, 7 та Nexia автомобили сотиб олинди. Йил якунига қадар режада белгиланган яна 10 машина босқичма-босқич келтирилиб, ўқув машғулотларида фойдаланишга берилади.
Изоҳ (0)