Bosh prokuratura akademiyasida “Mintaqaviy muloqot” xalqaro tashkilotining O‘zbekistondagi filiali bilan hamkorlikda amerikalik ekspertlar — AQSh Davlat departamenti Janubiy va Markaziy Osiyo ishlari bo‘yicha maslahatchisi Robert Brayden, AQSh adliya departamenti jinoyatlar bo‘limi boshlig‘i vazifasini bajaruvchi Treysi Plauell va shu departamentning elektron kuzatuv bo‘limi boshlig‘i Jon Shnitker bilan uchrashuv tashkil etildi.
Tadbirda akademiya tinglovchilari, prokuratura organlarining uyushgan jinoyatchilik va korrupsiyaga qarshi kurash yo‘nalishi, iqtisodiy jinoyatlarga qarshi kurash departamenti xodimlari hamda akademiya professor-o‘qituvchilari ishtirok etdi.
Tadbir davomida amerikalik ekspertlar AQSh adliya, prokuratura, sud idoralari, shuningdek, Davlat departamentida egallab kelayotgan lavozimlaridagi faoliyatlarining xususiyatlari, uyushgan jinoyatchilik, korrupsiya va iqtisodiy jinoyatlarga qarshi kurash faoliyatini muvofiqlashtirish masalalariga to‘xtaldi.
Amerikalik ekspertlarga poraxo‘rlik jinoyatlarini aniqlash, isbotlash, ushbu masalada jamoatchilik ishtiroki, protsessual majburlov choralarini qo‘llash, iqtisodiy jinoyatlarni, uyushgan guruhlar tarkibida sodir etilgan jinoyatlarni tergov qilish, ushbu toifadagi jinoyatlar oqibatida yetkazilgan zararlarni qoplash va shunga o‘xshash qator masalalar xususida savollar berildi.
Ekspertlar tadbir ishtirokchilarining yuqorida qayd etilgan toifadagi jinoyatlarga qarshi kurashda AQShda mavjud muammolar va ularni bartaraf etish yo‘llari xususidagi savollariga ham javob berib o‘tdi.
Izoh (0)