Бош прокуратура академиясида АҚШ Давлат ва адлия департаментлари вакиллари билан учрашув ўтказилди

Бош прокуратура академиясида «Минтақавий мулоқот» халқаро ташкилотининг Ўзбекистондаги филиали билан ҳамкорликда америкалик экспертлар — АҚШ Давлат департаменти Жанубий ва Марказий Осиё ишлари бўйича маслаҳатчиси Роберт Брайден, АҚШ адлия департаменти жиноятлар бўлими бошлиғи вазифасини бажарувчи Трейси Плауэлл ва шу департаментнинг электрон кузатув бўлими бошлиғи Жон Шниткер билан учрашув ташкил этилди.

Тадбирда академия тингловчилари, прокуратура органларининг уюшган жиноятчилик ва коррупцияга қарши кураш йўналиши, иқтисодий жиноятларга қарши кураш департаменти ходимлари ҳамда академия профессор-ўқитувчилари иштирок этди.

Тадбир давомида америкалик экспертлар АҚШ адлия, прокуратура, суд идоралари, шунингдек, Давлат департаментида эгаллаб келаётган лавозимларидаги фаолиятларининг хусусиятлари, уюшган жиноятчилик, коррупция ва иқтисодий жиноятларга қарши кураш фаолиятини мувофиқлаштириш масалаларига тўхталди.

Америкалик экспертларга порахўрлик жиноятларини аниқлаш, исботлаш, ушбу масалада жамоатчилик иштироки, процессуал мажбурлов чораларини қўллаш, иқтисодий жиноятларни, уюшган гуруҳлар таркибида содир этилган жиноятларни тергов қилиш, ушбу тоифадаги жиноятлар оқибатида етказилган зарарларни қоплаш ва шунга ўхшаш қатор масалалар хусусида саволлар берилди.

Экспертлар тадбир иштирокчиларининг юқорида қайд этилган тоифадаги жиноятларга қарши курашда АҚШда мавжуд муаммолар ва уларни бартараф этиш йўллари хусусидаги саволларига ҳам жавоб бериб ўтди.