Toshkent shahriga ish izlab kelib, bekatlarda tunab yurgan namanganlik mardikor ayol uyiga, oilasi bag‘riga qaytarildi. Bu haqda “Daryo” muxbiri Azizbek Abduvaliyev xabar bermoqda.
Ayolning ismi-sharifi Zuhra Matqulova bo‘lib, Chust tumanining “Qoraqo‘rg‘on” mahallasi, Beruniy ko‘chasida istiqomat qiladi. 38 yoshli ayol turmush o‘rtog‘i bilan kelishmovchiliklari va munosib ish topolmagani uchun Toshkent shahriga kelgan. O‘ziga o‘xshagan mardikor ayollar bilan turli yumushlarni bajarib, ijara uylarda yashab yurgan.
Bu haqdagi maqola e’lon qilingan kun — 22-iyunning o‘zida viloyat IIB ko‘magida ayolning manzili aniqlandi. Ertasiga Qo‘yliq dahasidagi muayyan yashash joyiga ega bo‘lmagan shaxslarni reabilitatsiya qilish markaziga Chust tuman xotin-qizlar qo‘mitasi bosh mutaxassisi Mamlakat Abdurahimova va “Qoraqo‘rg‘on” MFY raisi Ne’matjon Omonov yetib keldi. Ular Zuhra Matqulova bilan ko‘rishib, uni uyiga qaytarib olib keldi.
— Zuhraxonning ko‘chasi va hovlisida ta’mirlash, obodonlashtirish ishlari amalga oshirildi. Uning o‘zi yangi kiyim-bosh bilan ta’minlandi. Hokimlik tomonidan televizor, gaz plitasi va balloni taqdim etildi. Bir bosh echki ajratildi. Turmush o‘rtog‘i Tursunboy Tolibov bilan yarashtirib qo‘yildi, maktabning 2-sinfida tahsil oladigan qizi Umidani bag‘riga bosdi, — deydi viloyat hokimining o‘rinbosari, viloyat xotin-qizlar qo‘mitasi raisi Irodaxon Qo‘chqorova.
Mutasaddilarga ko‘ra, Zuhra Matqulova 25-iyun, dushanba kuni tibbiy ko‘rikdan o‘tkaziladi va ishga joylashtiriladi.
Izoh (0)