«Дарё»нинг Фарғонадаги мухбири маҳаллаларда ва оилаларда ижтимоий-маънавий муҳитни ўрганиш бўйича Республика ишчи гуруҳи аъзоси Лазиз Раҳматов томонидан берилган маълумотлар асосида Қўштепа туманидаги 21-мактабгача таълим муассасасининг ночор аҳволи билан танишди.
1970 йилда хўжалик шийпони боғча учун мослаштирилган ва йиллар давомида капитал таъмирланмаган. Болаларга жой етишмайди, мавжуд хоналар жуда тор. Шу сабабдан 90 ўринга мўлжалланган боғчада 75 нафар бола тарбияланмоқда.
Боғча биносининг баландлиги белгиланган меъёрдан паст, том қисми таъмирталаб. Канализация мавжуд эмас, иситиш тизими носоз. Мавжуд 2 та ёзги айвончанинг биттаси ишламайди, пол қисми синган, том қисми тешилган. Ёмғир ёғди дегунча ундан чакка ўтади. Ўйин майдончалари умуман йўқ. Ҳожатхона санитария талабларига мос эмас.
Мавжуд озиқ-овқат маҳсулотларини сақлаш учун музлатгич етишмайди. Ошхона ва гуруҳларга ичимлик суви киритилмаган. Мавжуд 3 гуруҳнинг ҳар бирида болалар битта хонада машғулот ўтади, овқатланади ва ухлайди.
1 хонадан иборат ошхона ҳам тор бўлиб, унда идиш-товоқларни ювиш ва сақлаш жойлари йўқ, кафеллари яроқсиз ҳолга келиб қолган.
Боғчада қўшимча яна 2 та гуруҳ ташкил этиш белгиланган. Аммо хона, зарур мебель ва жиҳозлар етишмаслиги туфайли амалда қўшимча гуруҳ очишнинг имкони йўқ.
Боғча мудираси Шоҳиста Камолованинг айтишича, 2017 йил якунида муассасани капитал таъмирлаш учун 738 миллион сўм маблағ ажратилиши кўзда тутилган эди. Аммо жорий йилнинг март ойига режалаштирилган таъмирлаш ишлари ҳанузгача бошланмаган.
Бугун Қўштепа туманидаги «Шакар» маҳалласида 387 нафар боғча ёшидаги болалар бор. Уларнинг 58 нафари 21-сонли, 11 нафари қўшни «Истиқлол» маҳалласидаги 2-сонли, 5 нафари Марғилон шаҳридаги 33-сонли боғчаларга қатнайди.
Қолган 313 нафар боланинг тақдири нима бўлади? Мавжуд боғчани таъмирлаш, қўшимча бинолар қуриш зарурлиги нега мутасадди раҳбарларни ташвишга солмайди? Президентнинг мактабгача таълим тизимини такомиллаштиришга доир фармон ва қарорлари Қўштепа туманида қачон ижро этилади?
Айни пайтда Фарғона вилоятида давлат-хусусий шерикчилиги асосида 38 та мактабгача таълим муассасаси фаолият юритмоқда. Тадбиркорлар кўмагида «Шакар» маҳалласида ҳам ана шундай замонавий боғчаларни ишга тушириш мумкин эмасми?
«Дарё» мазкур боғча билан боғлиқ мавзуга яна қайтади.
Изоҳ (0)