2018-yilning 3-iyun kuni Qatarda amaliy tashrif bilan bo‘lib turgan O‘zbekiston Tashqi ishlar vaziri Abdulaziz Komilov boshchiligidagi delegatsiya Doha shahrida Qatar bosh vaziri o‘rinbosari, tashqi ishlar vaziri shayx Muhammad Ben Abdel Rahman Ben Jasem Al Tani bilan uchrashdi, deb xabar beradi vazirlik matbuot xizmati.
Muzokaralarda siyosiy, savdo-iqtisodiy, investitsion, turizm, madaniy-gumanitar sohalarda ikki tomonlama aloqalar, shuningdek, xalqaro tuzilmalar doirasidagi hamkorlikning holati va istiqbollari muhokama qilindi.
Tashqi siyosat idoralari rahbarlari O‘zbekiston—Qatar hamkorligini rivojlantirish, unga ko‘p qirrali tus berishdan tomonlar manfaatdor ekanligini tasdiqlagan. Shu o‘rinda turli darajalar va shakllardagi aloqalarni faollashtirish, xususan, eng istiqbolli yo‘nalishlarni aniqlash va e’tiborni ularga qaratish imkonini yaratadigan vazirliklararo siyosiy maslahatlashuvlar o‘tkazish muhimligi qayd etilgan.
Xalqaro va mintaqaviy muammolar yuzasidan fikr almashish chog‘ida Imom Buxoriy nomidagi xalqaro ilmiy-tadqiqot markazi, Islom sivilizatsiyasi markazi va O‘zbekiston Islom akademiyasini tashkil etish bo‘yicha O‘zbekiston Prezidenti Shavkat Mirziyoyevning muhim tashabbuslarini amalga oshirish bo‘yicha hamkorlik masalalariga alohida e’tibor qaratilgan.
Vazirlar tomonidan Afg‘onistondagi vaziyatni tinch yo‘lda hal qilish bo‘yicha xalqaro konferensiyada 2018-yil 27-mart kuni qabul qilingan Toshkent deklaratsiyasini amalga oshirish jarayoni muhokama qilindi. Ushbu konferensiya ishida Qatar delegatsiyasi ham ishtirok etgan edi.
Uchrashuvda boshqa dolzarb masalalar ham ko‘rib chiqildi.
Izoh (0)