Dunyodagi eng yirik badiiy muzeylardan biri — Luvr Islom san’ati bo‘limida O‘zbekiston ekspozitsiyalarini ko‘rgazmaga qo‘yishga tayyorgarlikni boshlab yubordi. Bu haqda muzey mutaxassislari Fransiyada tanishuv safarida bo‘lgan bir qator O‘zbekiston OAVlari, shu jumladan, “Daryo” internet-nashri jurnalistiga ma’lum qildi.
Tayyorgarlik uch yil vaqt oladi, ko‘rgazmaning o‘zi esa O‘zbekiston tarixiy merosining Yevropadagi eng yirik namoyishiga aylanadi, dedi fransiyalik vakillar.
“Afsuski, ko‘pchilik hamyurtlarimiz va chet ellik mehmonlar O‘zbekistonning boy noyob madaniy merosi haqida juda kam ma’lumotga ega. Muzeyimizga yiliga qariyb 10 million kishi tashrif buyurishini hisobga olganda, Sharq mamlakati ekspozitsiyalari munosib qiziqish uyg‘otishiga ishonchimiz komil. Bu esa turli mamlakatlardan O‘zbekistonga ko‘p sonli sayyohlarni jalb qiladi. Bu madaniy ayirboshlash bilan birgalikda, davlat budjetiga anchagina daromad ham demakdir”, — deya ta’kidlab o‘tdi Parij muzeyi vakillari.
Ko‘rgazma doirasida turli darajalarda xalqaro konferensiya va uchrashuvlar o‘tkazilishi rejalashtirilmoqda.
Alisher Azimov, Toshkent — Parij — Toshkent.
Izoh (0)