Rossiyaning bir nechta qidiruv tizimlaridan Telegram yo‘qolib qoldi

Telegram messenjeri Rossiyaning bir nechta qidiruv tizimlarida chiqmay qoldi, deb xabar beradi “Kommersant”.

“Resurslarni filtrlash” qonuni doirasida Telegram “Mail.ru” va Sputnik kabi servislardan chiqarib yuborilgan. Shu bilan birga “Yandeks” va Google’da Pavel Durovning messenjeriga havolalarni hamon uchratish mumkin.

“Roskomnadzor” vakillarining tushintirishicha, “Yandeks” va Google hozircha taqiqlangan saytlarni filtrlovchi davlat axborot tizimiga to‘liq ulanmagan: mazkur qidiruv tizimlari ayni vaqtda bu imkoniyatni sinovdan o‘tkazmoqda.

Ta’kidlashicha, idoradagilar Google va “Yandeks” kompaniyasining texnik mutaxassislari bilan ma’lumot almashishgan, shuningdek, federal davlat axborot tizimidan olingan ma’lumotlarni qayta ishlash uchun avtomatik yuklov to‘xtatilgan.

Eslatib o‘tamiz, aprel oyida Moskvaning Tagansk tuman sudi “Roskomnadzor”ning Telegram messenjerini bloklash haqidagi talabini qanoatlantirgan edi.