Россиянинг бир нечта қидирув тизимларидан Telegram йўқолиб қолди

Telegram мессенжери Россиянинг бир нечта қидирув тизимларида чиқмай қолди, деб хабар беради «Коммерсантъ».

«Ресурсларни фильтрлаш» қонуни доирасида Telegram «Mail.ru» ва Sputnik каби сервислардан чиқариб юборилган. Шу билан бирга «Яндекс» ва Google’да Павел Дуровнинг мессенжерига ҳаволаларни ҳамон учратиш мумкин.

«Роскомнадзор» вакилларининг тушинтиришича, «Яндекс» ва Google ҳозирча тақиқланган сайтларни фильтрловчи давлат ахборот тизимига тўлиқ уланмаган: мазкур қидирув тизимлари айни вақтда бу имкониятни синовдан ўтказмоқда.

Таъкидлашича, идорадагилар Google ва «Яндекс» компаниясининг техник мутахассислари билан маълумот алмашишган, шунингдек, федерал давлат ахборот тизимидан олинган маълумотларни қайта ишлаш учун автоматик юклов тўхтатилган.

Эслатиб ўтамиз, апрель ойида Москванинг Таганск туман суди «Роскомнадзор»нинг Telegram мессенжерини блоклаш ҳақидаги талабини қаноатлантирган эди.