2018-yilning 15—16-may kunlari Moskva xalqaro savdo markazida VIII amaliy xavfsizlik masalalari bo‘yicha Positive Hack Days xalqaro forumi bo‘lib o‘tdi. Positive Technologies kompaniyasi tomonidan tashkillashtirilgan ushbu anjumanda kiberhimoya bo‘yicha yetuk mutaxassislar va xakerlik olamining elitasi, axborot xavfsizligi sohasidagi davlat tuzilmalari hamda yirik biznes vakillari va yosh olimlar ishtirok etdi. Bu haqda Axborot va jamoat xavfsizligi markazi matbuot xizmati xabar berdi.
Amaliy xavfsizlik masalalari bo‘yicha Positive Hack Days sakkizinchi xalqaro forumining kun tartibidagi iqtisodiyotni raqamlashtirishda davlat va regulyatorlarning roli; moliyaviy texnologiyalarning dijitallashuvi (raqamlashtirilishi); o‘ta muhim axborot infratuzilmasining xavfsizligi hamda axborot xavfsizligi xatarlarini kamaytirish va nazorat qilish bo‘yicha choralar, jismoniy xavfsizlikni ta’minlashning uslublari va vositalari bo‘yicha muhokamalar bo‘lib o‘tdi.
Alohida ta’kidlash joizki, Axborot va jamoat xavfsizligi markazi mutaxassislari 15 daqiqada himoya vositalarini aylanib o‘tib, bankomatni buzish va qurilmadan pullarni yechib olish vazifasi qo‘yilgan Leave ATM Alone nomli individual tanlovda ishtirok etishdilar. Shuningdek, ushbu tanlovda turli mamlakat vakillari qatnashdi. O‘tkazilgan individual tanlov natijalariga ko‘ra, Markaz mutaxassislari sharafli uchinchi o‘rinni qo‘lga kiritgan.
Izoh (0)