2018 йилнинг 15—16 май кунлари Москва халқаро савдо марказида VIII амалий хавфсизлик масалалари бўйича Positive Hack Days халқаро форуми бўлиб ўтди. Positive Technologies компанияси томонидан ташкиллаштирилган ушбу анжуманда киберҳимоя бўйича етук мутахассислар ва хакерлик оламининг элитаси, ахборот хавфсизлиги соҳасидаги давлат тузилмалари ҳамда йирик бизнес вакиллари ва ёш олимлар иштирок этди. Бу ҳақда Ахборот ва жамоат хавфсизлиги маркази матбуот хизмати хабар берди.
Амалий хавфсизлик масалалари бўйича Positive Hack Days саккизинчи халқаро форумининг кун тартибидаги иқтисодиётни рақамлаштиришда давлат ва регуляторларнинг роли; молиявий технологияларнинг дижиталлашуви (рақамлаштирилиши); ўта муҳим ахборот инфратузилмасининг хавфсизлиги ҳамда ахборот хавфсизлиги хатарларини камайтириш ва назорат қилиш бўйича чоралар, жисмоний хавфсизликни таъминлашнинг услублари ва воситалари бўйича муҳокамалар бўлиб ўтди.
Алоҳида таъкидлаш жоизки, Ахборот ва жамоат хавфсизлиги маркази мутахассислари 15 дақиқада ҳимоя воситаларини айланиб ўтиб, банкоматни бузиш ва қурилмадан пулларни ечиб олиш вазифаси қўйилган Leave ATM Alone номли индивидуал танловда иштирок этишдилар. Шунингдек, ушбу танловда турли мамлакат вакиллари қатнашди. Ўтказилган индивидуал танлов натижаларига кўра, Марказ мутахассислари шарафли учинчи ўринни қўлга киритган.
Изоҳ (0)