Ёшлар иттифоқи қошидаги кенгаш ёш фермерларни Японияга малака оширишга жўнатди. Бу ҳақда Қаҳрамон Қуронбоев Facebook’даги саҳифасида маълум қилди.
Шу йилнинг 9 майидан 5 июнига қадар Япониянинг Хоккайдо шаҳрида Марказий Осиё давлатлари фермерлари учун «Марказий Осиё мамлакатларида фермер хўжаликларини ривожлантириш» мавзусида халқаро ўқув-семинар бўлиб ўтмоқда. Унда Ўзбекистон ёш фермерлари кенгаши ва Япония халқаро ҳамкорлик агентлиги (JICA) ўртасидаги келишув дастури бўйича ўзбекистонлик ёш фермерлар ҳам иштирок этмоқда.
Жумладан, Тошкент вилояти, Янгийўл туманидаги Grain Well Group фермер хўжалиги раҳбари Алишер Турсунов ва Сирдарё вилояти, Сирдарё туманидаги «Исломбек Сарварбек Беҳруз» фермер хўжалиги раҳбари Ислом Ҳотамов семинарга юборилди.
Семинарда кўп тармоқли фермер хўжаликларини ривожлантиришда инновацион технологияларнинг аҳамияти, шунингдек, қишлоқ хўжалигида Япония ва дунё тажрибасини ўрганишга алоҳида эътибор қаратилмоқда.
Ҳамкорлик келишуви бўйича келгуси ойда ҳам ўзбекистонлик ёш фермерлар Японияда ташкил этиладиган ўқув-семинарда иштирок этиши кўзда тутилган.
Изоҳ (0)