Rossiya poytaxti Moskva shahri mezbonligida o‘tgan Mehribonlik uylari tarbiyalanuvchilari o‘rtasidagi Jahon Chempionatida bosh sovrinni qo‘lga kiritgan o‘zbekistonlik yosh futbolchilar bugun, 18-may sanasida Toshkentga qaytib keldi, deb xabar beradi O‘FA matbuot xizmati.
G‘oliblar Islom Karimov nomidagi Toshkent xalqaro aeroportida O‘zbekiston jismoniy tarbiya va sport vazirligi, O‘zbekiston Milliy olimpiya qo‘mitasi, O‘zbekiston futbol assotsiatsiyasi mutasaddilari, chempion yigitlarning murabbiy va tarbiyachilari, ommaviy axborot vositalari xodimlari, keng jamoatchilik tomonidan tantanali kutib olindi.
Ma’lumot uchun o‘zbekistonlik futbolchilar Jahon Chempionatida Pokiston (0:0, guruh), Rossiya (2:0, guruh), Nepal (2:1, chorak final), Burundi (1:0, yarim final) terma jamoalari bilan kuch sinashib, mag‘lubiyatsiz hal qiluvchi bahsga yetib keldi.
Final uchrashuvida o‘zbekistonliklar ikkinchi bor pokistonlik raqiblari bilan to‘qnash keldi. Uchrashuvning asosiy vaqtida durang (1:1) natija qayd etilgach, penaltiga murojaat etildi. Lotereyalar bahsida Pokiston termasi 6:5 hisobida mag‘lub etildi. Qayd etish kerak, Pokiston terma jamoasi Jahon chempionatining amaldagi g‘olibi hisoblanardi.
Izoh (0)