Qozog‘istonning Olmaota shahrida general Sag‘adat Nurmag‘ambetov xotirasiga bag‘ishlangan boks bo‘yicha Xalqaro turnirda O‘zbekiston Mudofaa vazirligi sport klubi a’zolari umumjamoa hisobida ikkinchi o‘rinni qo‘lga kiritdi. Bu haqda vazirlik matbuot xizmati “Daryo”ga xabar berdi.
Xalqaro turnirda ishtirok etgan 6 mamlakat (Qozog‘iston, Rossiya, Tojikiston, Mo‘g‘uliston, Qirg‘iziston va O‘zbekiston)ning 130 nafar harbiy sportchilari o‘zaro kuch sinashdi. An’anaviy xotira turnirida O‘zbekiston sharafini 10 nafar sportchi himoya qildi.
Musobaqada o‘zbekistonlik sportchilardan Abdullo Qo‘chqorov (56 kg) hamda Madiyor Sayidrahimovlar (+91 kg) oltin medalni qo‘lga kiritdi. Hasanboy Latipoxunov (52 kg), Shukur Rahimov (60 kg) va Bobousmon Botirov (69 kg) turnirning kumush medallari bilan taqdirlandi. Bronza medallariga esa Jahongir Rasulov (64 kg), Odiljon Aslonov (75 kg) va Kozimbek Mardonovlar (81 kg) tomonidan ega chiqildi.
Umumjamoa hisobi bo‘yicha turnir mezbonlari birinchi, O‘zbekiston ikkinchi va Rossiya esa uchinchi o‘rinni egalladi.
Izoh (0)