Маълумки, Адлия вазирлиги томонидан ҳар ҳафта қонун ҳужжатлари мазмуни, моҳияти ва аҳамияти аҳолига етказиш бўйича ишлар самарадорлигини ошириш, янги ёндашувларни жорий этиш мақсадида «Адлия ахбороти» номли брифинг ташкил этилиб келинмоқда. Бу ҳақда Адлия вазирлиги жамоатчилик билан алоқалар бўлими «Дарё» га хабар берди.
Шундан келиб чиқиб, жорий йилнинг 11 май куни ўтказилган брифингда 11 та қонун ҳужжати, шу жумладан 7 та Президент фармон ва қарорлари, 4 та Ҳукумат қарори ҳақида маълумот берилди.
Брифинг давомида иштирокчиларга Вазирлар Маҳкамасининг 2018 йил 4 майдаги «Болалар ва ўсмирлар адабиётини нашр этиш тизимини янада такомиллаштириш ва давлат томонидан қўллаб-қувватлаш чора-тадбирлари тўғрисида»ги қарори қабул қилинган бўлиб, унга кўра болалар ва ўсмирлар учун мўлжалланган адабиётларни арзон нархларда чоп этиш белгиланди.
Шунингдек, китоб савдоси билан шуғулланувчи ташкилотлар томонидан ҳудудларга китобларни етказиш билан боғлиқ харажатларни ҳисоб-китоб қилишда болалар ва ўсмирларга мўлжалланган китоблар нархининг асоссиз равишда ошиб кетишига йўл қўймаслик бўйича зурурий чоралар кўрилиши белгиланганлиги маърузачи томонидан тушунтирилди.
Бундан ташқари, Ўзбекистон Республикаси Президентининг 2018 йил 4 майдаги «Ички бозорни цемент билан барқарор таъминлаш бўйича қўшимча чора-тадбирлар тўғрисида»ги қарори ҳамда бошқа қонун ҳужжатларида назарда тутилган янгиликлар юзасидан ҳам маълумотлар тақдим этилди.
Брифингдан сўнг, оммавий ахборот воситалари ва ижтимоий тармоқларда Paynet ёпилаяптими деган мазмундаги муҳокамаларга сабаб бўлган Президентнинг 2018 йил 4 майдаги «Ўзбекистон Республикаси акциядорлик тижорат Халқ банки ва ‘Микрокредитбанк’ акциядорлик тижорат банкининг молиявий ҳолатини яхшилаш ҳамда фаолиятини янада такомиллаштириш чора-тадбирлари тўғрисида»ги қарорига бағишланган матубот анжумани ўтказилди.
Унда ОАВ вакилларига АТ Халқ банки мутахассиси Uzpaynet МЧЖнинг тугатилганлигини маълум килиб, унинг ўрнида янги Paynet бренди остида мазкур фаолият давом эттирилишини маълум қилди.
Халқ банкида жисмоний шахслардан етказиб берувчилар олдидаги ўз пуллик мажбуриятларини бажариш учун тўловлар қабул қилиш хизматларини кўрсатиш бўйича таркибий бўлинма тузилиши назарда тутилди.
Тадбирда ОАВ вакиллари Uzpaynet МЧЖда фаолият юритганлар тақдири, уни амалга оширишнинг замонавий шакллари ва қулайликлари ҳақидаги саволлар билан мурожаат қилишиб, уларга жавоблар олишди.
Бундан ташқари, матбуот анжуманида Адлия вазирлиги томонидан ишлаб чиқилаётган Ўзбекистон Республикаси Президентининг «Ўзбекистонда сўз эркинлиги кафолатларини кенгайтириш ва оммавий ахборот воситаларининг ролини ошириш чора-тадбирлари тўғрисида»ги фармони лойиҳаси юзасидан ҳам фикр-мулоҳазалар алмашинди. Журналистлар мазкур ҳужжат лойиҳаси бўйича ўз муносабатини билдириб, уни такомиллаштиришга қаратилган қуйидаги таклифларни билдиришди:
ОАВда чоп этилаётган муаллифлик материалларига жавобгарлик масаласини аниқлаштириш;
ОАВ сўровига биноан давлат органларидан ахборотларни ўз вақтида монеликсиз олиш;
Ижтимоий тармоқларда бериладиган ахборотларнинг ҳаққонийлигини ўрганиб, улар устидан назоратни ўрнатиш ва ҳ.к.
Эслатиб ўтамиз, бу каби тадбирлар ҳафтанинг ҳар жума куни «Тараққиёт стратегияси» марказида ўтказилади.
Изоҳ (0)