Uzbek Tigers WSB 8-mavsumidagi ishtirokini chorak finalsiz yakunlaydigan bo‘ldi

Boks bo‘yicha O‘zbekistonning Uzbek Tigers jamoasi uchun Butunjahon boks seriyasi (WSB)ning sakkizinchi mavsumi yakunlandi, deb yozadi “Olamsport”.

Unga ko‘ra, kecha 2-may sanasida musobaqaning pley-off bosqichi uchun yangi format tasdiqlandi.

Endi faqat guruhda g‘olib bo‘lgan jamoalargina keyingi bosqichda bahslarni davom ettiradi. Amaldagi mavsumda Uzbek Tigers jamoasi esa guruhda ikkinchi o‘rinni egallagan edi. Ular chorak finalda kimga raqib bo‘lishini kutayotgan bir vaqtda, bu mavsum chorak final bahslari o‘tkazilmasligi ma’lum bo‘ldi.

Endilikda yarim finalda British Lionhearts — Astana Arlans va France Fighting Roosters — Cuba Domadores jamoalari final yo‘llanmasi uchun o‘zaro jang qiladi.

Dastlabki janglar 18—19-may, javob bellashuvlari esa 25—26-may kunlari bo‘lib o‘tishi belgilangan.