Asli o‘zbekistonlik bo‘lgan qozoq milliarderi Fattoh Shodiyev 15-aprel kuni 65 yoshini nishonladi, deyiladi Facebook’dagi “O‘zbekistonning muvaffaqiyatli kishilari” sahifasi xabarida.
Ta’kidlanishicha, uning davlati 2 milliard dollardan ziyod. Ayni paytda Wikipedia’ga joylangan ma’lumotga ko‘ra, milliarderning boyligi 3,7 milliard dollarga baholanmoqda. 2011-yilgi Forbes jurnali milliarderlar ro‘yxatida dunyoda 297, Belgiyada 1-o‘rinda joylashgan.
1953-yil 15-aprelda Jizzax viloyatida tug‘ilgan, asli o‘zbekistonlik bo‘lgan qozoq milliarderi Fattoh Shodiyev Qozog‘iston prezidenti maslahatchisidir. Ayni paytda u Belgiya fuqarosi.
1976-yilda Moskva davlat xalqaro aloqalar institutini “xalqaro huquq” mutaxassisligi bo‘yicha tamomlagan. Rossiyalik taniqli biznesmen Alisher Usmonov va siyosiy arbob Sergey Yastrjembskiy bilan bitta kursda o‘qigan.
Biznes bo‘yicha sheriklari Aleksandr Mashkevich va Alijon Ibrohimov bilan foydali qazilmalar qazib olish sohasida dunyoda yetakchilardan biri bo‘lgan Eurasian National Resources Corporation (ENRC)ga asos solgan. ENRC ferrorxrom, alyuminiy oksidi va temir rudasi ishlab chiqarish bo‘yicha dunyoda yetakchi o‘rinlardan birini egallaydi.
Fattoh Shodiyev O‘zbekistonga 15 yil ichidan birinchi marta, 2017-yilda kelishga muvaffaq bo‘ldi. Ungacha tadbirkorning o‘z vataniga kirishi nomaqbul hisoblangan. U qilgan birinchi ish O‘zbekistondagi bolalar uylariga yordam beradigan Fattoh Shodiyev jamg‘armasi vakolatxonasini ochish bo‘ldi.
2017-yil sentabrida Adliya vazirligi tomonidan Shodiyev xalqaro fondining O‘zbekistondagi vakolatxonasi Davlat ro‘yxatidan o‘tkazilganligi xabar berilgan edi.
Izoh (0)