Асли ўзбекистонлик бўлган қозоқ миллиардери Фаттоҳ Шодиев 15 апрель куни 65 ёшини нишонлади, дейилади Facebook’даги «Ўзбекистоннинг муваффақиятли кишилари» саҳифаси хабарида.
Таъкидланишича, унинг давлати 2 миллиард доллардан зиёд. Айни пайтда Wikipedia’га жойланган маълумотга кўра, миллиардернинг бойлиги 3,7 миллиард долларга баҳоланмоқда. 2011 йилги Forbes журнали миллиардерлар рўйхатида дунёда 297, Бельгияда 1-ўринда жойлашган.
1953 йил 15 апрелда Жиззах вилоятида туғилган, асли ўзбекистонлик бўлган қозоқ миллиардери Фаттоҳ Шодиев Қозоғистон президенти маслаҳатчисидир. Айни пайтда у Бельгия фуқароси.
1976 йилда Москва давлат халқаро алоқалар институтини «халқаро ҳуқуқ» мутахассислиги бўйича тамомлаган. Россиялик таниқли бизнесмен Алишер Усмонов ва сиёсий арбоб Сергей Ястржембский билан битта курсда ўқиган.
Бизнес бўйича шериклари Александр Машкевич ва Алижон Иброҳимов билан фойдали қазилмалар қазиб олиш соҳасида дунёда етакчилардан бири бўлган Eurasian National Resources Corporation (ENRC)га асос солган. ENRC феррорхром, алюминий оксиди ва темир рудаси ишлаб чиқариш бўйича дунёда етакчи ўринлардан бирини эгаллайди.
Фаттоҳ Шодиев Ўзбекистонга 15 йил ичидан биринчи марта, 2017 йилда келишга муваффақ бўлди. Унгача тадбиркорнинг ўз ватанига кириши номақбул ҳисобланган. У қилган биринчи иш Ўзбекистондаги болалар уйларига ёрдам берадиган Фаттоҳ Шодиев жамғармаси ваколатхонасини очиш бўлди.
2017 йил сентябрида Адлия вазирлиги томонидан Шодиев халқаро фондининг Ўзбекистондаги ваколатхонаси Давлат рўйхатидан ўтказилганлиги хабар берилган эди.
Изоҳ (0)