Surxondaryo viloyatidagi “Mustaqillikning 25 yilligi” gaz konida baholash qudug‘ini burg‘ilash ishlari olib borilmoqda. Baholash qudug‘ining umumiy chuqurligi 3600 metrga teng bo‘lib, bugungi kungacha 2330 metri, ya’ni uchdan ikki qismi burg‘ilab bo‘lingan. Bu haqda “Mangazeya” axborot agentligi xabar bermoqda.
Surhan Gas Chemical Operating Company operator kompaniyasi “Mustaqillikning 25 yilligi” koni hududida uglevodorodlar zaxirasini aniqlash maqsadida baholash qudug‘ini qurish ishlarini yanvar oyida boshlagan edi.
Ushbu loyihani amalga oshirishi uchun burg‘ilovchi pudratchi sifatida Markaziy Osiyo, Rossiya va Yaqin Sharqda katta tajribaga ega bo‘lgan ERIELL burg‘ilash kompaniyasi jalb qilingan. Quduqning qurilishi uchun serovodorod ta’siri, me’yoridan ortiq plastik bosim va harorat, shuningdek, boshqa murakkab sharoitlarda ishlashda yuqori yuk ko‘tarish quvvatiga ega o‘ziga xos qurilma yaratildi. Loyiha doirasida servis xizmatlarini BakerHughes, Halliburton va NOV singari yetakchi xalqaro servis pudratchilari taqdim etmoqda.
Baholash qudug‘i bilan bir qatorda ayni damda “Mustaqillikning 25 yilligi” konida butun blok bo‘yicha shartnoma maydonining ekologik audit tekshiruvlari o‘tkazilmoqda, marketing tadqiqotlarini tashkil etish, loyihalar va zaxiralar auditini tubdan qayta ishlash borasida xalqaro maslahatchilar ishtirokidagi ishlar ham boshlab yuborilgan.
Izoh (0)