Сурхондарё вилоятидаги «Мустақилликнинг 25 йиллиги» газ конида баҳолаш қудуғини бурғилаш ишлари олиб борилмоқда. Баҳолаш қудуғининг умумий чуқурлиги 3600 метрга тенг бўлиб, бугунги кунгача 2330 метри, яъни учдан икки қисми бурғилаб бўлинган. Бу ҳақда «Мангазея» ахборот агентлиги хабар бермоқда.
Surhan Gas Chemical Operating Company оператор компанияси «Мустақилликнинг 25 йиллиги» кони ҳудудида углеводородлар захирасини аниқлаш мақсадида баҳолаш қудуғини қуриш ишларини январь ойида бошлаган эди.
Ушбу лойиҳани амалга ошириши учун бурғиловчи пудратчи сифатида Марказий Осиё, Россия ва Яқин Шарқда катта тажрибага эга бўлган ERIELL бурғилаш компанияси жалб қилинган. Қудуқнинг қурилиши учун сероводород таъсири, меъёридан ортиқ пластик босим ва ҳарорат, шунингдек, бошқа мураккаб шароитларда ишлашда юқори юк кўтариш қувватига эга ўзига хос қурилма яратилди. Лойиҳа доирасида сервис хизматларини BakerHughes, Halliburton ва NOV сингари етакчи халқаро сервис пудратчилари тақдим этмоқда.
Баҳолаш қудуғи билан бир қаторда айни дамда «Мустақилликнинг 25 йиллиги» конида бутун блок бўйича шартнома майдонининг экологик аудит текширувлари ўтказилмоқда, маркетинг тадқиқотларини ташкил этиш, лойиҳалар ва захиралар аудитини тубдан қайта ишлаш борасида халқаро маслаҳатчилар иштирокидаги ишлар ҳам бошлаб юборилган.
Изоҳ (0)