Qozonlik erkak xotinining qarindoshlari uyida otishma uyushtirdi, so‘ng o‘z joniga qasd qildi

Rossiya Federatsiyasi tarkibidagi Tatariston Respublikasining Qozon shahrida otishma uyushtirgan erkak to‘rt nafar katta yoshli va uch nafar voyaga yetmagan shaxslar bo‘lgan xonadonga kirib olishga urindi, deb yozadi “RIA Novosti”.

Qozon fuqarosi 27-fevral, seshanba kuni kechki payt shahardagi uylardan birida otishma uyushtirib, uch kishini, shu jumladan, politsiyachi va “Rosgvardiya” xodimini yaraladi. Jabrlanganlar kasalxonaga yetkazildi, ammo keyinroq “Rosgvardiya” xodimi vafot etdi.

Dastlabki ma’lumotlarga ko‘ra, ov miltig‘i bilan qurollangan 36 yoshli yovuz niyatli erkak xotinining qarindoshlari uyiga kelib (bu paytda xotini shu yerda mehmonda bo‘lgan), tartibsiz o‘t ochishni boshlagan va xonadonga kirishga uringan. U yerda bu paytda to‘rt nafar katta yoshlilar bilan birga uch bola ham bo‘lgan.

IIV bergan dastlabki axborotga ko‘ra, hodisaga maishiy kelishmovchilik sabab bo‘lgan. Erkak xotini bilan nizoda bo‘lgan va uning arizasi bilan bezorilik uchun o‘n kunga qamalgan. Jazoni o‘tab bo‘lgach, erkak qo‘liga qurol olib, xotini va uning akasi bilan “hisoblashmoqchi” bo‘lgan.

Erkakni qo‘lga olish chog‘ida u o‘z joniga qasd qilgan.