Қозонлик эркак хотинининг қариндошлари уйида отишма уюштирди, сўнг ўз жонига қасд қилди

Россия Федерацияси таркибидаги Taтaристон Республикасининг Қозон шаҳрида отишма уюштирган эркак тўрт нафар катта ёшли ва уч нафар вояга етмаган шахслар бўлган хонадонга кириб олишга уринди, деб ёзади «РИА Новости».

Қозон фуқароси 27 февраль, сешанба куни кечки пайт шаҳардаги уйлардан бирида отишма уюштириб, уч кишини, шу жумладан, полициячи ва «Росгвардия» ходимини яралади. Жабрланганлар касалхонага етказилди, аммо кейинроқ «Росгвардия» ходими вафот этди.

Дастлабки маълумотларга кўра, ов милтиғи билан қуролланган 36 ёшли ёвуз ниятли эркак хотинининг қариндошлари уйига келиб (бу пайтда хотини шу ерда меҳмонда бўлган), тартибсиз ўт очишни бошлаган ва хонадонга киришга уринган. У ерда бу пайтда тўрт нафар катта ёшлилар билан бирга уч бола ҳам бўлган.

ИИВ берган дастлабки ахборотга кўра, ҳодисага маиший келишмовчилик сабаб бўлган. Эркак хотини билан низода бўлган ва унинг аризаси билан безорилик учун ўн кунга қамалган. Жазони ўтаб бўлгач, эркак қўлига қурол олиб, хотини ва унинг акаси билан «ҳисоблашмоқчи» бўлган.

Эркакни қўлга олиш чоғида у ўз жонига қасд қилган.