Yaponiyaning janubiy qirg‘og‘idan diametri 10 kilometr, balandligi 600 metr keladigan ulkan suv osti vulqoni topildi. Agarda u harakatga keladigan bo‘lsa 100 milliondan ortiq odam halok bo‘lishi mumkin, deb xabar berdi “Nauka”.
Vulqonni aniqlangan KOBEC okean osti tadqiqot markazi mutaxassislarining fikricha, bu kabi vulqon so‘nggi marta bundan 7300 yil oldin harakatga kelgan. Shundan so‘ng Tinch okeanining Kagosima prefekturasi yaqinidagi hududida diametri 20 kilometr keladigan chuqurlik paydo bo‘lgan.
Suv osti vulqonini tadqiq etishda NHK telekanalidagi ilmiy-ma’rifiy dastur uchun tasvirga olingan videolar muhim rolni o‘ynagan. Suratga olish jarayonida aktyor Xideaki Takidzava 20 metr chuqurlikka sho‘ng‘ib, vulqon gumbazidan turli toshlarni terib chiqqan. Natijada ularning barchasi tadqiqot laboratoriyasiga yuborilgan.
“Kikay vulqonining 100 yil ichida harakatga kelish ehtimolligi 1 foizga teng. Shunga qaramay agarda u otilgudek bo‘lsa, qurbonlar soni 100 millionga yetishi mumkin”, — deydi KOBEC professori Yosiyuki Tatsumi.
Hozirda mamlakat hududida 110 ga yaqin faol vulqonlar mavjud bo‘lib, ularning eng xavflilari Kyusyu orolida joylashgan. So‘nggi 120 ming yil ichida yapon arxipelagida 10 ta suv osti vulqoni otilgan.
Izoh (0)