Япониянинг жанубий қирғоғидан диаметри 10 километр, баландлиги 600 метр келадиган улкан сув ости вулқони топилди. Агарда у ҳаракатга келадиган бўлса 100 миллиондан ортиқ одам ҳалок бўлиши мумкин, деб хабар берди «Наука».
Вулқонни аниқланган КОBЕC океан ости тадқиқот маркази мутахассисларининг фикрича, бу каби вулқон сўнгги марта бундан 7300 йил олдин ҳаракатга келган. Шундан сўнг Тинч океанининг Кагосима префектураси яқинидаги ҳудудида диаметри 20 километр келадиган чуқурлик пайдо бўлган.
Сув ости вулқонини тадқиқ этишда NHK телеканалидаги илмий-маърифий дастур учун тасвирга олинган видеолар муҳим ролни ўйнаган. Суратга олиш жараёнида актёр Хидэаки Такидзава 20 метр чуқурликка шўнғиб, вулқон гумбазидан турли тошларни териб чиққан. Натижада уларнинг барчаси тадқиқот лабораториясига юборилган.
«Кикай вулқонининг 100 йил ичида ҳаракатга келиш эҳтимоллиги 1 фоизга тенг. Шунга қарамай агарда у отилгудек бўлса, қурбонлар сони 100 миллионга етиши мумкин», — дейди КОBЕC профессори Ёсиюки Тацуми.
Ҳозирда мамлакат ҳудудида 110 га яқин фаол вулқонлар мавжуд бўлиб, уларнинг энг хавфлилари Кюсю оролида жойлашган. Сўнгги 120 минг йил ичида япон архипелагида 10 та сув ости вулқони отилган.
Изоҳ (0)