Toshkent shahar ichki ishlar bosh boshqarmasining migratsiya va fuqarolikni rasmiylashtirish boshqarmasi imkoniyati cheklangan fuqarolarga murojaat qilib, eski pasportlarni 2018-yilning 1-iyuliga qadar biometrik pasportlarga almashtirish zarurligi haqida eslatdi, deb xabar beradi “Gazeta.uz”.
Biometrik pasportni joriy etish boshlangan 2011-yildan beri Toshkent shahar aholisining 99 foizi yangi pasport olishga muvaffaq bo‘lgan.
Imkoniyati cheklangan fuqarolarning qarindoshlari yoki qo‘shnilari biometrik pasport olish uchun migratsiya va fuqarolikni rasmiylashtirish boshqarmasining tumanlardagi bo‘linmalariga murojaat qilishi mumkin.
Biometrik ma’lumotlarni to‘plash punktlari qoshida ariza beruvchining barmoq izi va suratini yashash joyi, shifoxona yoki boshqa muassasalarda olish imkoniyatini beruvchi mobil stansiyalar tashkil etilgan.
Yangi pasport olish uchun quyidagi hujjatlarni taqdim etish zarur:
- Biometrik pasport olish uchun ariza;
- O‘zbekiston Respublikasi fuqarosining pasporti;
- Nogironlik to‘g‘risidagi guvohnoma yoki tibbiy muassasa ma’lumotnomasi;
- Fuqaro biometrik ma’lumotlarni to‘plash punktlariga sog‘lig‘i tufayli mustaqil ravishda murojaat qila olmasligi haqidagi dalolatnoma;
- Davlat boji to‘langanligi haqida kvitansiya.
Izoh (0)