IIV internet tarmog‘ida farg‘onalik yosh qizchaning o‘limi to‘g‘risida tarqalgan xabar yuzasidan raddiya berdi

O‘zbekiston IIV matbuot xizmati joriy yilning 9-fevral kuni internet tarmog‘ida farg‘onalik besh yoshli qizchaning o‘limi to‘g‘risida “Ehtiyot bo‘ling! O‘zbekistonda bolalarning organlarini o‘g‘irlab ketayotgan jinoiy guruh paydo bo‘ldi” (“Осторожно! Узбекистане появилась новая банда, ворующая детей на органы”) mazmundagi tarqalgan xabar asossiz ekanligini ma’lum qildi.

“O‘zbekiston Respublikasi hududida yosh bolalarni o‘g‘rilayotgan jinoiy guruhlar yo‘qligi, farg‘onalik qizchaning esa barcha ichki a’zolari mavjud bo‘lib, olib qo‘yish yoki transplantatsiya holatlari aniqlanmagan”, — deyiladi xabarda.

Hozirda qizchaning o‘limi bilan bog‘liq holat yuzasidan tergov harakatlari davom etmoqda. Respublika hududida sodir etilayotgan jinoyatlar va hodisalar haqidagi haqqoniy va to‘liq ma’lumotlar bilan faqat Ichki ishlar vazirligining veb-saytida va Telegram kanalida tanishish mumkin.