Beshariqdagi “Andarxon” xalqaro maqomiga ega bo‘lgan chegara-bojxona posti ochildi

Farg‘ona viloyati Beshariq tumanidagi “Andarxon” xalqaro maqomiga ega bo‘lgan chegara-bojxona posti ochildi, deb xabar berdi O‘zA.

Bundan sakkiz yil oldin yopilgan O‘zbekiston —Tojikiston chegarasida joylashgan “Andarxon” chegara-bojxona postining ochilishi aholi uchun katta qulayliklarni yaratadi. Bu yerda chegara oldi hudud aholisi soddalashtirilgan tartibda chegaradan o‘tish tizimi joriy qilindi. Endilikda bu yerda telegramma va taklif xatisiz bemalol harakatlanish mumkin.

“Haqiqatdan ham ikki qo‘shni xalq o‘rtasidagi to‘siqlar sababli qarindosh-urug‘larimiz bilan bordi-keldi uzilib qolgan edi. Hatto to‘y yoki ma’rakalarda ham qatnasha olmasdik. Axir biz asrlar davomida qo‘shni bo‘lib yashaganmiz, bordi-keldilarimiz mustahkam bo‘lgan. Mana bu postning ochilishi ham aholi uchun katta imkoniyat bo‘ldi. Bu kunni barchamiz intiqlik bilan kutganmiz. Barchamiz yaqinlarimiz bilan diydorlashdik” – deydi Beshariq tumanidagi “Qiyali” mahalla fuqarolar yig‘ini raisi Ulug‘bek Qo‘chqorov.