Xitoylik ayol 81 yoshda oliy ma’lumotga ega bo‘ldi

81 yoshli xitoylik ayol Syue Minsyu 4-fevral kuni Tyan Szin universitetini tugatgani haqidagi diplomni qo‘lga kiritdi, deb xabar beradi “Trend.az”.

Ayol uzoq kutilgan bu kunga yetguncha tinimsiz mehnat qildi.

“Men hayot mazmuni inson o‘z oldiga yangi maqsad va rejalar qo‘yib, mukammallik sari intilishida, deb hisoblayman. Shuning uchun ham Tyan Szin universitetiga yoshligimdagi orzularimni amalga oshirishiga ko‘mak bergani uchun minnatdorchilik bildiraman”, — deydi Syue Minsyu diplom topshirish marosimida.

Syue Minsyu Tyan Szin universitetining “Elektron tijorat” kursiga 2014-yilda masofaviy o‘qitish dasturi bo‘yicha qabul qilingan edi. O‘shanda u 77 yoshda edi.

Ayol guruhdagi eng keksa talaba bo‘libgina qolmay, u o‘zining tirishqoqligi bilan ham ajralib turardi. U har kuni ertalab soat beshda turib, dars qilish uchun kompyuterni yoqardi.

Syue vaqtini faqat o‘qishga bag‘ishlash uchun to‘rt yil davomida biron marta ham televizorni yoqmagan. U yakuniy imtihonni yettinchi urinishdan so‘ng topshirishga muvaffaq bo‘lgan.

81 yoshli ayol beshta tilni (xitoy, ingliz, fransuz, rus va lotin) biladi. U shuningdek, Excel va Photoshop kabi dasturlar bilan ishlashni ham o‘zlashtirgan.

Syue o‘qishdan bo‘sh vaqtida suratga olish, konkida uchish va suzish bilan shug‘ullanadi.