Qarshi — Termiz temir yo‘l liniyasida elektrlashtirish ishlari yakunlanib, ilk yo‘lovchi poyezdi qatnay boshladi. Bu haqda “Xalq so‘zi” xabar bermoqda.
Ilgari poytaxtdan chiqqan yo‘lovchi poyezdi Termizga 15-16 soat davomida yetib kelar edi. Atigi 5 oy ichida ro‘yobga chiqarilgan mazkur loyiha tufayli bu vaqt qariyb 3 soatga qisqardi.
Shu bilan birga, yonilg‘i xarajatlari kamaytirilib, atrof-muhit musaffoligi ta’minlanadi. Yuk tashish hajmi esa 2 baravar ortadi. Lokomotivlar so‘nggi rusumdagi axborot-kommunikatsiya vositalari bilan jihozlangan. Bu esa ularni boshqarishda bir qancha kulayliklarni yaratadi.
Oldin qatnovni amalga oshirish uchun old va orqa tomondan teplovozlarning yordamiga ehtiyoj sezilardi. Endilikda bunga hojat qolmadi. Zamonaviy elektrovozlar 20 tagacha vagonni bemalol torta oladi.
Umumiy uzunligi 325 kilometrdan iborat Qarshi — Termiz temir yo‘l liniyasini elektrlashtirish ishlari Yangi yil arafasida to‘liq nihoyasiga yetkazildi. O‘tgan davr mobaynida ushbu masofada jami 6 ta nimstansiya barpo etildi. Loyiha amalga oshirilishi uchun esa jami 327,6 million dollar miqdorida mablag‘ yo‘naltirildi.
Izoh (0)