Қарши — Термиз темир йўл линиясида электрлаштириш ишлари якунланди

Қарши — Термиз темир йўл линиясида электрлаштириш ишлари якунланиб, илк йўловчи поезди қатнай бошлади. Бу ҳақда «Халқ сўзи» хабар бермоқда.

Илгари пойтахтдан чиққан йўловчи поезди Термизга 15-16 соат давомида етиб келар эди. Атиги 5 ой ичида рўёбга чиқарилган мазкур лойиҳа туфайли бу вақт қарийб 3 соатга қисқарди.

Шу билан бирга, ёнилғи харажатлари камайтирилиб, атроф-муҳит мусаффолиги таъминланади. Юк ташиш ҳажми эса 2 баравар ортади. Локомотивлар сўнгги русумдаги ахборот-коммуникация воситалари билан жиҳозланган. Бу эса уларни бошқаришда бир қанча кулайликларни яратади.

Олдин қатновни амалга ошириш учун олд ва орқа томондан тепловозларнинг ёрдамига эҳтиёж сезиларди. Эндиликда бунга ҳожат қолмади. Замонавий электровозлар 20 тагача вагонни бемалол торта олади.

Умумий узунлиги 325 километрдан иборат Қарши — Термиз темир йўл линиясини электрлаштириш ишлари Янги йил арафасида тўлиқ ниҳоясига етказилди. Ўтган давр мобайнида ушбу масофада жами 6 та нимстанция барпо этилди. Лойиҳа амалга оширилиши учун эса жами 327,6 миллион доллар миқдорида маблағ йўналтирилди.