Turkiyada davom etayotgan Travel Turkey Izmir—2017 xalqaro sayyohlik ko‘rgazmasida Buxoro viloyati rasmiylari ham qatnashmoqda, deya xabar bermoqda Live Bukhara nashri.
Xabar berishlaricha, xalqaro tadbir doirasida Buxoro viloyati hokimining turizm masalalari bo‘yicha o‘rinbosari Botir Shahriyorov Turkiyaning Eskishehir shahri meri O‘zdemir Chakajak bilan uchrashgan.
Uchrashuv chog‘ida tomonlar turizm, madaniyat va biznes yo‘nalishlari ikki tomonlama munosabatlarni rivojlantirish bo‘yicha kelishuvga erishgan, ayni vaqtda, Buxoro va Eskishehir o‘rtasida birodarlash shaharlar memorandumini imzolashga tayyor ekanliklarini bildirgan.
Shuningdek, Botir Shahriyorov Turkiya kurort shaharlaridan biri — Kushadasi meri o‘rinbosari Ayshan Sharifo‘g‘li bilan ham uchrashgan. Sharifo‘g‘li Buxoro va Kushadasini birodarlashgan shaharlar deb e’lon qilishni va tegishli bitimni imzolashni taklif qilgan.
Live Bukhara’ning Sharifo‘g‘li so‘zlaridan iqtibos keltirishicha, Kushadasi shahri har yili 3 million nafargacha sayyohni qabul qiladi, turizm sohasi esa hududda 1 millionga yaqin odamni ish bilan band etgan.
Eskishehir — Turkiya shimoli-g‘arbidagi shahar, aholisi 800 mingdan ziyod. Shaharda Onado‘li universiteti joylashgan — unda 800 mingdan ziyod talaba ta’lim oladi; oliygoh talabalari soni bo‘yicha Turkiyada birinchi, jahonda to‘rtinchi o‘rinda turadi.
Kushadasi — Turkiya g‘arbida, Egey dengizi bo‘yida joylashgan kurort shahar; aholisi 70 mingdan ziyod. Plyajlari bilan tanilgan bu shahar katta va kichik mehmonxonalar, restoranlar, klublar va bozorchalarga to‘la. Ko‘hna Efes shahri yaqinida joylashgani bilan ham e’tiborga molik.
Izoh (0)