Туркияда давом этаётган Travel Туркей Измир—2017 халқаро сайёҳлик кўргазмасида Бухоро вилояти расмийлари ҳам қатнашмоқда, дея хабар бермоқда Live Bukhara нашри.
Хабар беришларича, халқаро тадбир доирасида Бухоро вилояти ҳокимининг туризм масалалари бўйича ўринбосари Ботир Шаҳриёров Туркиянинг Эскишеҳир шаҳри мери Ўздемир Чакажак билан учрашган.
Учрашув чоғида томонлар туризм, маданият ва бизнес йўналишлари икки томонлама муносабатларни ривожлантириш бўйича келишувга эришган, айни вақтда, Бухоро ва Эскишеҳир ўртасида биродарлаш шаҳарлар меморандумини имзолашга тайёр эканликларини билдирган.
Шунингдек, Ботир Шаҳриёров Туркия курорт шаҳарларидан бири — Кушадаси мери ўринбосари Айшан Шарифўғли билан ҳам учрашган. Шарифўғли Бухоро ва Кушадасини биродарлашган шаҳарлар деб эълон қилишни ва тегишли битимни имзолашни таклиф қилган.
Live Bukhara’нинг Шарифўғли сўзларидан иқтибос келтиришича, Кушадаси шаҳри ҳар йили 3 миллион нафаргача сайёҳни қабул қилади, туризм соҳаси эса ҳудудда 1 миллионга яқин одамни иш билан банд этган.
Эскишеҳир — Туркия шимоли-ғарбидаги шаҳар, аҳолиси 800 мингдан зиёд. Шаҳарда Онадўли университети жойлашган — унда 800 мингдан зиёд талаба таълим олади; олийгоҳ талабалари сони бўйича Туркияда биринчи, жаҳонда тўртинчи ўринда туради.
Кушадаси — Туркия ғарбида, Эгей денгизи бўйида жойлашган курорт шаҳар; аҳолиси 70 мингдан зиёд. Пляжлари билан танилган бу шаҳар катта ва кичик меҳмонхоналар, ресторанлар, клублар ва бозорчаларга тўла. Кўҳна Efeс шаҳри яқинида жойлашгани билан ҳам эътиборга молик.
Изоҳ (0)