29-noyabr, chorshanba kuni o‘zining tarixiy maksimumiga erishgan bitkoin birdaniga qariyb 1000 dollarga tushib ketdi. Coindesk birjalarining ma’lumotlariga ko‘ra, Toshkent vaqti bilan soat 02:01 da bitkoin narxi 9916 dollarni tashkil etgan, deb xabar berdi “Vedomosti”.
29-noyabrdagi ochiq savdolarda bitkoin narxi 9909 dollarni tashkil etgan. Soat 19:14 da esa (Toshkent vaqti bilan) eng mashhur kriptovalyutaning narxi 15 foizga o‘sib, o‘z tarixidagi maksimumga — 11 363 dollarga chiqqan.
Bitkoin 2017-yilning noyabridan boshlab faol ravishda qimmatlashmoqda. Kursning mustahkamlanishiga dunyodagi eng yirik birja operatorlaridan biri — CME Group’ning ushbu kriptovalyutada fyucherslarni yaratish qarori sabab bo‘lgan. Bundan tashqari 29-noyabr kuni Amerikaning Nasdaq birjasi ham fyucherslarni bitkoinda sotishga tayyorlanayotgani ma’lum bo‘ldi.
“Investorlar bitkoin narxining bu qadar tez o‘sayotganidan yuzaga keluvchi xatardan boxabar bo‘lishlari kerak“, — dedi Buyuk Britaniya Markaziy banki rahbari o‘rinbosari Jon Kanliff.
Izoh (0)