“Uning uch nafar farzandi va olti nafar nabirasi bo‘lib, ular bilan muloqot unga katta quvonch keltirardi”, — deyiladi majmua saytidagi tarjimai holda.
Uch nafar farzand va olti nafar nabira haqidagi so‘zlar majmua saytining ingliz va rus tillaridagi talqinida ham qayd etib o‘tilgan.
Qayd etish joiz, Birinchi Prezidentning avvalgi rasmiy tarjimai hollarida farzandlar soni ikki nafar, nabiralar soni besh nafar deb ko‘rsatilar edi.
Xususan, “Xalq so‘zi” gazetasida 2015-yil fevralida e’lon qilingan Islom Karimovning rasmiy tarjimai holida ikki farzandi, besh nafar nabirasi borligi ko‘rsatilgan.
Shuningdek, O‘zbekiston Prezidenti matbuot xizmati sayti — “Press-service.uz”ning “Archive.org”dagi 2016-yil 6-avgustdan saqlab qo‘yilgan talqinida ham Birinchi Prezidentning ikki farzandi, besh nabirasi borligi ta’kidlangan.
Islom Karimov ilmiy-ma’rifiy majmuasi saytida Birinchi Prezidentning uchinchi farzandining ismi-sharifi, yoshi, jinsi va boshqa ma’lumotlari berilmagan.
Islom Karimovning Gulnora (1972-yilda tug‘ilgan) va Lola (1978-yilda tug‘ilgan) ismli qizlari borligi ma’lum. Gulnora Karimovaning Islom ismli o‘g‘li va Imon ismli qizi, Lola Karimova-Tillayevaning Maryam va Sofiya ismli qizlari, Umar ismli o‘g‘li bor.
Izoh (0)