O‘zbekiston Prezidenti Shavkat Mirziyoyev har 10 kunda Tashkent City xalqaro biznes markazining qurilish loyihasi qay yo‘sinda amalga oshirilayotganini shaxsan nazorat qilishini aytdi. Bu haqda “Axborot 24” dasturiga tayanib, “Gazeta.uz” xabar berdi.
“Tashkent City — bu biz jahon hamjamiyatiga o‘zimizni namoyon qilishimizga imkon beruvchi obyekt. Bu tarix, Toshkentga yangilik kerak… Bizning o‘ylanib o‘tirishga vaqtimiz yo‘q”, — dedi 28-oktabr kuni qurilish joyiga tashrif buyurgan Prezident.
Mazkur zamonaviy kompleks Toshkentning Alisher Navoiy, Olmazor, Islom Karimov va Furqat ko‘chalari oralig‘idagi 80 gektar hududda barpo etiladi. Loyihaga muvofiq Tashkent City’da biznes markazlar, savdo majmualari, mehmonxonalar, ofislar, kongresslar zali, ko‘rgazma zallari, ko‘p qavatli zamonaviy uylar, restoranlar, sun’iy ko‘l, favvoralar, ijtimoiy va boshqa obyektlar quriladi.
Markazni loyihalashtirish va qurishga O‘zbekiston va xorijiy davlatlarning yetakchi loyiha institutlari, chet ellik investorlar jalb etilmoqda.
Tashkent City davlat univer korxonasining direktori Jahongir Ortiqxo‘jayevning ma’lum qilishicha, loyihani amalga oshirish uchun mashhur nemis kompaniyasi jalb etilgan. Loyiha to‘rt yilga mo‘ljallangan va ikki bosqichda amalga oshiriladi. Birinchi bosqich — 2020-yilning may oyiga qadar, ikkinchisi esa —2021-yilning oxiriga qadar.
Bu yerga 1,75 million kvadrat metr binolar, 16 gektar maydonga ega avtoturargohlar, 2 gektar joyni egallovchi sun’iy ko‘l qurilishi rejalashtirilmoqda.
Davlat arxitektura va qurilish qo‘mitasining raisi Botir Zokirovning aytishicha, Tashkent City konsepsiyasini tayyorlash ustida sakkiz oy ish olib borilgan. Natijada turli tashkilotlardan yettita konsepsiya, jumladan, O‘zbekiston institutlari va xorij arxitektura kompaniyalari tomonidan taqdim etilgan.
Loyihaning master-rejasini Turkiyaning Tabanlıoğlu Architect kompaniyasi yaratgan, deb xabar berdi Tashkent City boshqarmasining rahbari Bahrom Rizayev.
Izoh (0)