O‘zbekiston Birinchi Prezidenti Islom Karimovning birinchi turmushidan Pyotr ismli o‘g‘li bor. Bu haqda “Kun.uz” xabar bermoqda.
Xabar berishlaricha, Islom Karimov 1960-yillar boshida birinchi marta Natalya Petrovna Kuchmaga uylangan. Birinchi turmushidan Pyotr Karimov ismli o‘g‘li bo‘lgan. Xabarlarda Pyotr Karimov 1969-yilda tavallud topgani aytiladi.
Foto: “Kun.uz”
Ma’lumotlarga ko‘ra, Natalya Kuchma 2008-yili Toshkent shahrida vafot etgan. Pyotr Karimov esa ayni vaqtda Rossiyaning Moskva viloyatida doimiy istiqomat qiladi.
Islom Karimov keyinchalik Tatyana Akbarovnaga uylangan. Bu nikohdan 1972-yili to‘ng‘ich qizi Gulnora Karimova va 1978-yili kenja qizi Lola Karimova dunyoga kelgan. Gulnora Karimovaning Islom ismli o‘g‘li va Imon ismli qizi, Lola Karimova-Tillayevaning esa Maryam va Safiya ismli qizlari va Umar ismli o‘g‘li bor.
O‘zbekiston Birinchi Prezidenti Islom Karimovning uchinchi farzandi haqida shu vaqtgacha rasmiy manbalarda ma’lumot berilmagan edi. Biroq kuni kecha ishga tushgan Islom Karimov ilmiy-ma’rifiy majmuasi saytidagi rasmiy tarjimai holda Birinchi Prezidentning “uch nafar farzand, olti nafar nabirasi” bo‘lgani ta’kidlangan.
Mavzuga doir: O‘zbekiston Birinchi Prezidenti Islom Karimovning farzandlari uch nafar bo‘lgani haqida ilk bor rasmiy ma’lumot berildi
Ayni vaqtda, ilmiy-ma’rifiy majmua saytida Islom Karimovning farzandlari va nabiralari haqida batafsil axborot berilmagan.
