«Унинг уч нафар фарзанди ва олти нафар набираси бўлиб, улар билан мулоқот унга катта қувонч келтирарди», — дейилади мажмуа сайтидаги таржимаи ҳолда.
Уч нафар фарзанд ва олти нафар набира ҳақидаги сўзлар мажмуа сайтининг инглиз ва рус тилларидаги талқинида ҳам қайд этиб ўтилган.
Қайд этиш жоиз, Биринчи Президентнинг аввалги расмий таржимаи ҳолларида фарзандлар сони икки нафар, набиралар сони беш нафар деб кўрсатилар эди.
Хусусан, «Халқ сўзи» газетасида 2015 йил февралида эълон қилинган Ислом Каримовнинг расмий таржимаи ҳолида икки фарзанди, беш нафар набираси борлиги кўрсатилган.
Шунингдек, Ўзбекистон Президенти матбуот хизмати сайти — «Press-service.uz»нинг «Archive.org»даги 2016 йил 6 августдан сақлаб қўйилган талқинида ҳам Биринчи Президентнинг икки фарзанди, беш набираси борлиги таъкидланган.
Ислом Каримов илмий-маърифий мажмуаси сайтида Биринчи Президентнинг учинчи фарзандининг исми-шарифи, ёши, жинси ва бошқа маълумотлари берилмаган.
Ислом Каримовнинг Гулнора (1972 йилда туғилган) ва Лола (1978 йилда туғилган) исмли қизлари борлиги маълум. Гулнора Каримованинг Ислом исмли ўғли ва Имон исмли қизи, Лола Каримова-Тиллаеванинг Марям ва София исмли қизлари, Умар исмли ўғли бор.
Изоҳ (0)