Reuters: Suriyada bir yil ichida rus armiyasi tarkibida bo‘lmagan 130 nafardan ortiq rossiyalik halok bo‘ldi

Suriyada 2017-yilning yanvaridan sentabr oyiga qadar kamida 131 nafar Rossiya fuqarosi halok bo‘ldi, ularning hech biri rus armiyasi safida xizmat qilmagan. Bu haqda Reuters’ga tayanib, Meduza xabar berdi.

Agentlikka Sergey Poddubniy ismli Rossiya fuqarosining o‘limi borasidagi ma’lumotnoma kelib tushgan. Ushbu ma’lumotnoma Rossiyaning Suriyadagi elchixonasining konsullik bo‘limi tomonidan 4-oktabr kuni taqdim etilgan. Ma’lumotnoma raqami — 131.

Konsullikning agentlikka tasdiqlashicha, o‘lim haqida ma’lumotlar numeratsiyasi har yili yangilanadi. Shunday qilib ma’lumotnomaning har bir raqami konsullik tomonidan joriy yil boshidan buyon ro‘yxatdan o‘tkazilgan o‘limlar sonini bildiradi. Konsullik, shuningdek, harbiylarning o‘limini qayd etmasligini ma’lum qildi.

Ma’lumotnomaga ko‘ra, Sergey Poddubniy 28-sentabr kuni Tias shaharida halok bo‘lgan. Uning tanishi va qarindoshining ma’lum qilishicha, Sergey shartnoma asosida harbiy operatsiyalarda ishtirok etish uchun Suriyaga yo‘l olgan.

Suriyada halok bo‘lgan 131 nafar rossiyalikning qanchasi jangovar harakatlar vaqtida halok bo‘lgani noma’lum. Agentlikning qayd etishicha, ular tarkibiga jangarilar safida harakat qilayotgan Rossiya fuqarolari kirmaydi, chunki ularning jasadi Rossiyaga qaytarib jo‘natilmaydi.