Сурияда 2017 йилнинг январидан сентябрь ойига қадар камида 131 нафар Россия фуқароси ҳалок бўлди, уларнинг ҳеч бири рус армияси сафида хизмат қилмаган. Бу ҳақда Reuters’га таяниб, Meduza хабар берди.
Агентликка Сергей Поддубний исмли Россия фуқаросининг ўлими борасидаги маълумотнома келиб тушган. Ушбу маълумотнома Россиянинг Суриядаги элчихонасининг консуллик бўлими томонидан 4 октябрь куни тақдим этилган. Маълумотнома рақами — 131.
Консулликнинг агентликка тасдиқлашича, ўлим ҳақида маълумотлар нумерацияси ҳар йили янгиланади. Шундай қилиб маълумотноманинг ҳар бир рақами консуллик томонидан жорий йил бошидан буён рўйхатдан ўтказилган ўлимлар сонини билдиради. Консуллик, шунингдек, ҳарбийларнинг ўлимини қайд этмаслигини маълум қилди.
Маълумотномага кўра, Сергей Поддубний 28 сентябрь куни Тиас шаҳарида ҳалок бўлган. Унинг таниши ва қариндошининг маълум қилишича, Сергей шартнома асосида ҳарбий операцияларда иштирок этиш учун Сурияга йўл олган.
Сурияда ҳалок бўлган 131 нафар россияликнинг қанчаси жанговар ҳаракатлар вақтида ҳалок бўлгани номаълум. Агентликнинг қайд этишича, улар таркибига жангарилар сафида ҳаракат қилаётган Россия фуқаролари кирмайди, чунки уларнинг жасади Россияга қайтариб жўнатилмайди.
Изоҳ (0)