Janubiy Osetiya tashqi ishlar vaziri Dmitriy Medoyev uning mamlakati Kataloniyaning mustaqilligini tan olish masalasini ko‘rib chiqishga tayyor ekanini ma’lum qildi. Bu haqda “Kommersant” xabar bermoqda.
“Men o‘zim hozirgina Barselonadan qaytdim, u yerda o‘z vakolatxonamiz ofisini ochdik. Janubiy Osetiya rahbariyati, agar Kataloniyadan tegishli murojaat kelib tushsa, Kataloniyaning mustaqilligini tan olish masalasini ko‘rib chiqishga tayyor”, — dedi Medoyev.
Avvalroq Abxaziya tashqi ishlar vaziri o‘rinbosari Kan Taniya uning mamlakati ham Kataloniyadan tushajak taklifni ko‘rib chiqishga tayyor ekanini ma’lum qilgan edi.
Ma’lumot uchun, Abxaziya va Janubiy Osetiyaning o‘zi ham qisman tan olingan davlatlar hisoblanadi. Janubiy Osetiyaning mustaqilligini BMTga a’zo to‘rt mamlakat, Abxaziyaning mustaqilligini esa BMTga a’zo besh mamlakat tan olgan, xolos. Gruziya ushbu respublikalarning har ikkisini Rossiya tomonidan noqonuniy ravishda bosib olingan o‘z hududlari deb hisoblaydi.
Izoh (0)