Жанубий Осетия ташқи ишлар вазири Дмитрий Медоев унинг мамлакати Каталониянинг мустақиллигини тан олиш масаласини кўриб чиқишга тайёр эканини маълум қилди. Бу ҳақда «Коммерсантъ» хабар бермоқда.
«Мен ўзим ҳозиргина Барселонадан қайтдим, у ерда ўз ваколатхонамиз офисини очдик. Жанубий Осетия раҳбарияти, агар Каталониядан тегишли мурожаат келиб тушса, Каталониянинг мустақиллигини тан олиш масаласини кўриб чиқишга тайёр», — деди Медоев.
Аввалроқ Абхазия ташқи ишлар вазири ўринбосари Кан Тания унинг мамлакати ҳам Каталониядан тушажак таклифни кўриб чиқишга тайёр эканини маълум қилган эди.
Маълумот учун, Абхазия ва Жанубий Осетиянинг ўзи ҳам қисман тан олинган давлатлар ҳисобланади. Жанубий Осетиянинг мустақиллигини БМТга аъзо тўрт мамлакат, Абхазиянинг мустақиллигини эса БМТга аъзо беш мамлакат тан олган, холос. Грузия ушбу республикаларнинг ҳар иккисини Россия томонидан ноқонуний равишда босиб олинган ўз ҳудудлари деб ҳисоблайди.
Изоҳ (0)