Dmitriy Medvedev O‘zbekistonga rasmiy tashrif uyushtiradi

Rossiya bosh vaziri Dmitriy Medvedev keyingi hafta O‘zbekistonga rasmiy tashrif bilan keladi. Bu haqda UzNews xabar bermoqda.

Rasmiy tashrifi chog‘ida Medvedev O‘zbekiston Prezidenti Shavkat Mirziyoyev bilan uchrashadi hamda MDH hukumatlari rahbarlari kengashi yig‘ilishida ishtirok etadi.

O‘zbekiston bosh vaziri Abdulla Aripov bilan muzokaralar 2-noyabrga mo‘ljallangan. Uchrashuv chog‘ida o‘zaro aloqalarning rivojlanish istiqbollari, shuningdek, mintaqaviy va xalqaro miqyosdagi dolzarb masalalar ko‘rib chiqilishi kutilmoqda.

Muzokaralar yakunlariga ko‘ra hukumatlararo, idoralararo va korporativ hujjatlar paketi imzolanishi kutilmoqda.

3-noyabr kuni Toshkentda Medvedev MDH hukumatlari rahbarlari kengashi sammitida ishtirok etadi.