Las-Vegasda 59 kishini o‘ldirgan Stiven Peddok kim o‘zi? Uning qurbonlari-chi?

Qotil

Stiven Peddok 1953-yilda tug‘ilgan, ikki ukasi bor. Peddokning otasi Benjamin oila bilan birga yashamagan — 1961-yili bir necha bankni o‘margani uchun 20 yilga qamalgan, so‘ng qamoqdan qochib, Oregonda yashiringan. 1970-yillar oxirida u yana qo‘lga olingan. 1998-yili vafot etgan. Peddokning onasi o‘g‘illari hali bola vaqtida ularning otasi qamoqda o‘tirganini aytmay, “otang o‘lgan”, deb aytgan.

Stiven kollejni tamomlab, 1980-yillarda Lockheed Martin kompaniyasida hisobchi bo‘lib ishlagan, so‘ng ko‘chmas mulk bilan shug‘ullanib, yaxshigina boylik orttirgan. The Washington Post’ning yozishicha, qarindoshlari uning boyligini ikki million dollarga baholagan. Peddok o‘z yashash joyini tez-tez o‘zgartirib turgan, 2016-yilda Nevadaga ko‘chib kelgan. U ko‘pincha asosan pensionerlar yashaydigan kichik shaharlardan ko‘chmas mulk sotib olib, so‘ng ularni pullagan.

Peddok Nevadadagi uyida ko‘p ham bo‘lavermagan: qarindoshlari va tanishlarining so‘zlariga ko‘ra, u professional kazino o‘yinchisi edi va haftalab kazinolar huzuridagi mehmonxonalarda yashagan. Ukasi Erik Peddokning so‘zlariga ko‘ra, bir safar Stiven ketma-ket to‘rt oy shunday mehmonxonada yashagan. Aka-ukalarning o‘zaro munosabati yaxshi edi va ular vaqti-vaqti bilan ko‘rishib, otamlashib turgan: 2016-yili Erik akasining Nevadadagi Meskit shaharchasiga ko‘chib o‘tishiga yordam bergan. Ular so‘nggi bor 2017-yil sentabri boshida gaplashgan — o‘shanda Stiven onasining ahvoli haqida so‘ragan. 89 yoshli ayol Floridada, yaqinda to‘fondan zarar ko‘rgan hududda istiqomat qiladi; Stiven onasining ahvoli bilan qiziqib, unga sovg‘a yuborgan.

Erik Peddokning so‘zlariga ko‘ra, Stiven yakka o‘zi yashagan, ikki marta oila qurganiga qaramay, uning farzandlari yo‘q edi. Azart o‘yinlarni professional darajada o‘ynagan, katta stavka bilan pul tikkan, hatto bir safar avtomobil yutib olgan. Erikning aytishicha, Stiven pulga amaliy jihatdan yondashardi, u qimmat bo‘lmagan liboslar kiyar va o‘z boyligini ko‘z-ko‘z qilmasdi. Na qarindoshlari, na tanishlari va qo‘nishlari Stivenni tajovuzkor odam deb ayta oladi; u hech qachon siyosiy qarashlarini oshkor qilmagan, o‘zini o‘ziga yarasha qiziqishlari bor inson sifatida xotirjam tutar, hech kimga xalal bermas va hech kimni bezovta qilmas edi. Biror bir qurolga qiziqishi borligini ham, har holda, oshkora bildirmagan.

Stiven Peddok uchuvchilik qila olardi, muddati o‘tib ketgan bo‘lsa-da, uchuvchilik litsenziyasi bor edi; uning katta bo‘lmagan ikki samolyoti bo‘lgan. Hech qachon qonun bilan muammosi bo‘lmagan. Kantri musiqani sevar va Las-Vegasdagi o‘zi qatnashchilariga qarata o‘t ochgan festivallarga o‘xshash tadbirlarga tez-tez borib turardi.

U so‘nggi vaqtlarda kelib chiqishi filippinlik Marilu Denli ismli ayol bilan uchrashib turgani ma’lum. Dastlab u ham qidiruvga berildi, so‘ng politsiya bu ayolning otishmaga hech qanday aloqasi yo‘qligini, so‘nggi bir haftani ham umuman AQShdan tashqarida o‘tkazganini aniqladi.

Qurol

Mandalay Bay otelining Peddok nomiga olingan 32-qavatidagi xonadan 23 dona qurol, xususan, “Kalashnikov” avtomati nusxasi, yarimavtomatik AR-15 miltig‘ining muqobili topildi (yana 19 ta qurol uning uyidan chiqdi). Ikkita qurol uchoyoqqa mustahkamlab qo‘yilgan edi. Qotillik joyidan olingan videoyozuvlarga asoslanib xulosa qilinsa, Peddok, katta ehtimol bilan, avtomatik quroldan otgan — har holda, uzilayotgan o‘qlarning yuqori tezligi shunday xulosa chiqarishga asos beradi.

AQShda avtomatik qurol, ya’ni, barmoq hali tepkida turgan vaqtda o‘q otadigan qurol savdosi qonunchilik bilan qat’iy tartibga solinadi — uni shunchaki sotib olish imkonsiz. Aftidan, Peddokning qo‘lida asosan mergan tepkini qanchalik tez bossa, shunchalik tez o‘q otadigan yarimavtomatik qurollar bo‘lgan. Bunday vositalarning yarimavtomatik qurol ishlash mexanizmini avtomatik qurolniki yaqinlashtirib beruvchi qonuniy modifikatsiyalari bor — bunday modifikatsiyalar bilan soniyasiga besh-o‘ntadan o‘q uzish mumkin. Taxminlarga ko‘ra, Peddokda ham aynan shunday qurol bo‘lgan, biroq bu ma’lumot rasman tasdiqlanganicha yo‘q.

Peddokning xonasidagi qurollarning ko‘pligini u stvollarning qizib ketishidan xavotir olgani bilan izohlash mumkin. U qaysi quroldan aynan qancha o‘q uzganini politsiya hozircha ma’lum qilmadi. Miltiqlardan tashqari uning yonida kamida bitta to‘pponcha ham bo‘lgan. U qurollarni noqonuniy yo‘l bilan sotib olgani borasida ma’lumotlar yo‘q, umuman olganda, bunga ehtiyoj ham tug‘ilmagan bo‘lsa kerak: qonun nuqtai nazaridan, u istalgan ruxsat etilgan qurolni sotib olishga haqli edi. Boz ustiga, Nevada qonunlari bunday qurollarni sotib olishga nisbatan qat’iy cheklovlar o‘rnatmagan.

Dastlab Stiven Peddokni politsiya maxsus kuchlari otib tashlagani xabar qilingan edi, biroq keyinroq u o‘z joniga o‘zi qasd qilgani ma’lum bo‘ldi. Bu qanday sodir bo‘lgani noma’lum. Katta ehtimol bilan, maxsus xizmat qotil o‘tirgan xonani yong‘in signalizatsiyasi orqali tezda aniqlagan — signalizatsiya tizimi tinmay o‘q uzish vaqtida ajralib chiqqan qurol gazidan ishlab ketishi kerak edi, deb yozadi The Washington Post.

Qurbonlar

Stiven Peddok 59 kishini otib tashladi, bu AQSh tarixidagi eng yirik ommaviy qotillikdir. 527 kishi yaralangan. Otishma boshlangan vaqtda yakuniga yetay deb qolgan Route 91 Harvest festivaliga 22 mingga yaqin odam to‘plangan edi.

Barcha qurbonlar borasida aniq axborot yo‘q, biroq amerikalik jurnalistlar ulardan ba’zilari haqidagi ma’lumotlarni to‘plashga muvaffaq bo‘ldi.

• 35 yoshli Adrian Myorfitt Alyaskadan Las-Vegasdagi kantri-festivalga do‘stlari bilan birga kelgan edi, u baliqchilik bilan shug‘ullanar va muvaffaqiyatli mavsumdan so‘ng hordiq chiqarishga qaror qilgandi (bu va keyingi qurbonlar haqidagi ma’lumotlar — The New York Times’dan).
• 29 yoshli Sonni Melton Tennesida feldsher bo‘lib ishlardi, otishma boshlangan vaqtda u xotinini olib, qochgan; o‘q uning beliga tekkan. Meltonning ayoli (ular bir yilcha avval turmush qurgan edi) omon qolgan.
• 53 yoshli Syuzan Smit, kaliforniyalik kantri ixlosmandi, mahalliy maktab xodimasi va ikki farzandning onasi edi. Smit Las-Vegasga do‘stlari bilan konsertda mehmon bo‘lish uchun kelgan edi.
• Kanadalik mexanik Jordan Makildun, 23 yosh. U Las-Vegasga sevgan qizi bilan birga kelgan edi.
• Nyu-meksikolik Liza Romero-Muniz to‘yining yubileyi munosabati bilan Las-Vegasda edi. Eri unga sevimli kantri-qo‘shiqchisi Jeyson Eldinning konsertiga chipta olib bergan edi — otishma aynan Eldin qo‘shiq aytayotgan vaqtda boshlangan. Romero-Muniz maktabda maslahatchi bo‘lib ishlar, uning uch farzandi bor edi.
• Kanadalik Jessika Klimchuk Alberta provinsiyasida maktab kutubxonachisi bo‘lib ishlar va maktab avtobusini haydardi. 28 yoshli ayoldan to‘rt farzand qoldi.
• Las-vegaslik 34 yoshli politsiyachi Charlston Xartfild konsert vaqti xizmatda emas, mehmon edi. U politsiyadagi faoliyati haqida memuar yozayotgan, amerikacha futbol bo‘yicha bolalar jamoasiga murabbiylik qilayotgan edi. Uning o‘limi haqida The Las Vegas Review Journal xabar berdi.

Boshqa qurbonlarning shaxsi haqida hozircha aniq ma’lumotlar yo‘q.