Yaponiya 2030-yilga kelib AESlardan foydalanishdan to‘liq voz kechishi bir necha omillar tufayli qiyin bo‘ladi. Bu haqda mamlakat iqtisodiyot, savdo va sanoat vaziri Xirosige Seko ma’lum qildi, deya xabar beradi “TASS”.
“Bu reallikka to‘g‘ri kelmaydi. Biz atom energiyasidan foydalanishni to‘liq to‘xtatishimiz qiyin. Hozirda dunyo hamjamiyati parnik gazlarining atmosferaga tashlanmasini qisqartirishga urinmoqda va Yaponiyaning AESlardan voz kechishi mazkur global muammoni hal etish bo‘yicha majburiyatlarini bajarishiga salbiy ta’sir ko‘rsatadi. Shuningdek, bu elektr energiyasiga tariflarning oshishiga olib keladi, xususiy iste’molchilar, kichik va o‘rta biznesga zarba berishi mumkin”, — dedi Xirosige Seko.
Vazir shu tariqa Tokio gubernatori va yaqinda yangi “Umid partiyasi” raisi etib saylangan Yuriko Koikening mamlakatda barcha reaktorlardan foydalanishni to‘xtatish zarurligi haqidagi bayonotiga javob berdi.
Ma’lumot uchun, 2011-yilda “Fukusima-1” AESda avariya sodir bo‘lgunga qadar Yaponiya energetikasi atom energiyasi ulushi 30 foizni tashkil etardi.
Izoh (0)