Лас-Вегасда 59 кишини ўлдирган Стивен Пэддок ким ўзи? Унинг қурбонлари-чи?

Қотил

Стивен Пэддок 1953 йилда туғилган, икки укаси бор. Пэддокнинг отаси Бенжамин оила билан бирга яшамаган — 1961 йили бир неча банкни ўмаргани учун 20 йилга қамалган, сўнг қамоқдан қочиб, Орегонда яширинган. 1970 йиллар охирида у яна қўлга олинган. 1998 йили вафот этган. Пэддокнинг онаси ўғиллари ҳали бола вақтида уларнинг отаси қамоқда ўтирганини айтмай, «отанг ўлган», деб айтган.

Стивен коллежни тамомлаб, 1980 йилларда Lockheed Martin компаниясида ҳисобчи бўлиб ишлаган, сўнг кўчмас мулк билан шуғулланиб, яхшигина бойлик орттирган. The Washington Post’нинг ёзишича, қариндошлари унинг бойлигини икки миллион долларга баҳолаган. Пэддок ўз яшаш жойини тез-тез ўзгартириб турган, 2016 йилда Невадага кўчиб келган. У кўпинча асосан пенсионерлар яшайдиган кичик шаҳарлардан кўчмас мулк сотиб олиб, сўнг уларни пуллаган.

Пэддок Невададаги уйида кўп ҳам бўлавермаган: қариндошлари ва танишларининг сўзларига кўра, у профессионал казино ўйинчиси эди ва ҳафталаб казинолар ҳузуридаги меҳмонхоналарда яшаган. Укаси Эрик Пэддокнинг сўзларига кўра, бир сафар Стивен кетма-кет тўрт ой шундай меҳмонхонада яшаган. Ака-укаларнинг ўзаро муносабати яхши эди ва улар вақти-вақти билан кўришиб, отамлашиб турган: 2016 йили Эрик акасининг Невададаги Мескит шаҳарчасига кўчиб ўтишига ёрдам берган. Улар сўнгги бор 2017 йил сентябри бошида гаплашган — ўшанда Стивен онасининг аҳволи ҳақида сўраган. 89 ёшли аёл Флоридада, яқинда тўфондан зарар кўрган ҳудудда истиқомат қилади; Стивен онасининг аҳволи билан қизиқиб, унга совға юборган.

Эрик Пэддокнинг сўзларига кўра, Стивен якка ўзи яшаган, икки марта оила қурганига қарамай, унинг фарзандлари йўқ эди. Азарт ўйинларни профессионал даражада ўйнаган, катта ставка билан пул тиккан, ҳатто бир сафар автомобиль ютиб олган. Эрикнинг айтишича, Стивен пулга амалий жиҳатдан ёндашарди, у қиммат бўлмаган либослар кияр ва ўз бойлигини кўз-кўз қилмасди. На қариндошлари, на танишлари ва қўнишлари Стивенни тажовузкор одам деб айта олади; у ҳеч қачон сиёсий қарашларини ошкор қилмаган, ўзини ўзига яраша қизиқишлари бор инсон сифатида хотиржам тутар, ҳеч кимга халал бермас ва ҳеч кимни безовта қилмас эди. Бирор бир қуролга қизиқиши борлигини ҳам, ҳар ҳолда, ошкора билдирмаган.

Стивен Пэддок учувчилик қила оларди, муддати ўтиб кетган бўлса-да, учувчилик лицензияси бор эди; унинг катта бўлмаган икки самолёти бўлган. Ҳеч қачон қонун билан муаммоси бўлмаган. Кантри мусиқани севар ва Лас-Вегасдаги ўзи қатнашчиларига қарата ўт очган фестивалларга ўхшаш тадбирларга тез-тез бориб турарди.

У сўнгги вақтларда келиб чиқиши филиппинлик Марилу Дэнли исмли аёл билан учрашиб тургани маълум. Дастлаб у ҳам қидирувга берилди, сўнг полиция бу аёлнинг отишмага ҳеч қандай алоқаси йўқлигини, сўнгги бир ҳафтани ҳам умуман АҚШдан ташқарида ўтказганини аниқлади.

Қурол

Mandalay Bay отелининг Пэддок номига олинган 32-қаватидаги хонадан 23 дона қурол, хусусан, «Калашников» автомати нусхаси, яримавтоматик AR-15 милтиғининг муқобили топилди (яна 19 та қурол унинг уйидан чиқди). Иккита қурол учоёққа мустаҳкамлаб қўйилган эди. Қотиллик жойидан олинган видеоёзувларга асосланиб хулоса қилинса, Пэддок, катта эҳтимол билан, автоматик қуролдан отган — ҳар ҳолда, узилаётган ўқларнинг юқори тезлиги шундай хулоса чиқаришга асос беради.

АҚШда автоматик қурол, яъни, бармоқ ҳали тепкида турган вақтда ўқ отадиган қурол савдоси қонунчилик билан қатъий тартибга солинади — уни шунчаки сотиб олиш имконсиз. Афтидан, Пэддокнинг қўлида асосан мерган тепкини қанчалик тез босса, шунчалик тез ўқ отадиган яримавтоматик қуроллар бўлган. Бундай воситаларнинг яримавтоматик қурол ишлаш механизмини автоматик қуролники яқинлаштириб берувчи қонуний модификациялари бор — бундай модификациялар билан сониясига беш-ўнтадан ўқ узиш мумкин. Тахминларга кўра, Пэддокда ҳам айнан шундай қурол бўлган, бироқ бу маълумот расман тасдиқланганича йўқ.

Пэддокнинг хонасидаги қуролларнинг кўплигини у стволларнинг қизиб кетишидан хавотир олгани билан изоҳлаш мумкин. У қайси қуролдан айнан қанча ўқ узганини полиция ҳозирча маълум қилмади. Милтиқлардан ташқари унинг ёнида камида битта тўппонча ҳам бўлган. У қуролларни ноқонуний йўл билан сотиб олгани борасида маълумотлар йўқ, умуман олганда, бунга эҳтиёж ҳам туғилмаган бўлса керак: қонун нуқтаи назаридан, у исталган рухсат этилган қуролни сотиб олишга ҳақли эди. Боз устига, Невада қонунлари бундай қуролларни сотиб олишга нисбатан қатъий чекловлар ўрнатмаган.

Дастлаб Стивен Пэддокни полиция махсус кучлари отиб ташлагани хабар қилинган эди, бироқ кейинроқ у ўз жонига ўзи қасд қилгани маълум бўлди. Бу қандай содир бўлгани номаълум. Катта эҳтимол билан, махсус хизмат қотил ўтирган хонани ёнғин сигнализацияси орқали тезда аниқлаган — сигнализация тизими тинмай ўқ узиш вақтида ажралиб чиққан қурол газидан ишлаб кетиши керак эди, деб ёзади The Washington Post.

Қурбонлар

Стивен Пэддок 59 кишини отиб ташлади, бу АҚШ тарихидаги энг йирик оммавий қотилликдир. 527 киши яраланган. Отишма бошланган вақтда якунига етай деб қолган Route 91 Harvest фестивалига 22 мингга яқин одам тўпланган эди.

Барча қурбонлар борасида аниқ ахборот йўқ, бироқ америкалик журналистлар улардан баъзилари ҳақидаги маълумотларни тўплашга муваффақ бўлди.

• 35 ёшли Адриан Мёрфитт Аляскадан Лас-Вегасдаги кантри-фестивалга дўстлари билан бирга келган эди, у балиқчилик билан шуғулланар ва муваффақиятли мавсумдан сўнг ҳордиқ чиқаришга қарор қилганди (бу ва кейинги қурбонлар ҳақидаги маълумотлар — The New York Times’дан).
• 29 ёшли Сонни Мелтон Теннесида фелдшер бўлиб ишларди, отишма бошланган вақтда у хотинини олиб, қочган; ўқ унинг белига теккан. Мелтоннинг аёли (улар бир йилча аввал турмуш қурган эди) омон қолган.
• 53 ёшли Сьюзан Смит, калифорниялик кантри ихлосманди, маҳаллий мактаб ходимаси ва икки фарзанднинг онаси эди. Смит Лас-Вегасга дўстлари билан концертда меҳмон бўлиш учун келган эди.
• Канадалик механик Жордан Макилдун, 23 ёш. У Лас-Вегасга севган қизи билан бирга келган эди.
• Нью-мексиколик Лиза Ромеро-Муниз тўйининг юбилейи муносабати билан Лас-Вегасда эди. Эри унга севимли кантри-қўшиқчиси Жейсон Элдиннинг концертига чипта олиб берган эди — отишма айнан Элдин қўшиқ айтаётган вақтда бошланган. Ромеро-Муниз мактабда маслаҳатчи бўлиб ишлар, унинг уч фарзанди бор эди.
• Канадалик Жессика Климчук Альберта провинциясида мактаб кутубхоначиси бўлиб ишлар ва мактаб автобусини ҳайдарди. 28 ёшли аёлдан тўрт фарзанд қолди.
• Лас-вегаслик 34 ёшли полициячи Чарльстон Хартфилд концерт вақти хизматда эмас, меҳмон эди. У полициядаги фаолияти ҳақида мемуар ёзаётган, америкача футбол бўйича болалар жамоасига мураббийлик қилаётган эди. Унинг ўлими ҳақида The Las Vegas Review Journal хабар берди.

Бошқа қурбонларнинг шахси ҳақида ҳозирча аниқ маълумотлар йўқ.